Ndërlidhjet

logo-print

Mustafa nis punën, prioritete ligjet për FAK-un dhe Gjykatën Speciale


Isa Mustafa dhe Hashim Thaçi.

Isa Mustafa dhe Hashim Thaçi.

Qeveria e Kosovës do t'i kryej obligimet që ka marrë përsipër në këtë situatë mjaftë të ndjeshme politike, ka deklaruar kryeministri i ri i Kosovës, Isa Mustafa. Këto komente, Mustafa i bëri në mbledhjen e parë të përbërjes së re të qeverisë së Kosovës, ku në vija të përgjithësuara ka shpalosur pikat programore.

I ulur për herë të parë në karrigen e kryeministrit, Mustafa kishte nga ana e djathtë edhe kryeministri i deritashëm, Hashim Thaçi, i cili sipas marrëveshjes për bashkëqeverisje ndërmjet Partisë Demokratike të Kosovës dhe Lidhjes Demokratike të Kosovës, do të ketë postin e zëvendëskryeministrit.

Pak çaste para mbledhjes së qeverisë, Thaçi përmes një ceremonie nën përcjelljen e gardës ceremoniale të Forcës së Sigurisë së Kosovës, i dorëzoi detyrën pasuesit të tij, Isa Mustafa.

Gjatë mbledhjes së parë të ekzekutivit nën udhëheqjen e kryeministrit të ri, Mustafa u zotua të përmbushë shumë obligime që ka marrë përsipër vendi.

“Kemi marrë përgjegjësinë në një situatë të ndjeshme për Kosovën. Do të jemi të përkushtuar në zhvillimin ekonomik, integriminin evropian. Shprehim përkushtimin tonë që me përgjegjësi t’i kryejmë obligimet tona si qeveri. Do të bashkëpunojë me presidenten Atifete Jahjaga dhe me të gjithë përfaqësuesit institucional dhe politikë”, ka deklaruar Mustafa.

Kreu i qeverisë së Kosovës ka thënë me këtë rast se plani qeverisës për vitin 2015 do të jetë i gatshëm në janar, duke paralajmëruar se disa projekte për të cilat ka dyshime të realizohen, nuk do të përfshihen në të.

Ndërkaq si prioritete, Mustafa i ka përmendur disa projektligje, ndër ta edhe atë për themelimin e Forcave të Armatosura të Kosovës dhe projektligjin për Gjykatën Speciale për Krime të Luftës në Kosovë.

Mustafa është zotuar se gjatë mandatit 4 vjeçar në fokus të qeverisjes do të ketë zhvillimin ekonomik, zbutjen e papunësisë dhe angazhimet në fushën e sundimit të rendit dhe ligjit. Po ashtu, ai ka përmendur edhe shumë sfida në fushën e arsimit, shëndetësisë dhe reformat në administratë.

Një sfidë tjetër mbase do të jetë edhe lobimi për njohjet e reja dhe anëtarësim të Kosovës në mekanizma dhe organizata ndërkombëtare.

  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG