Qeveria e Kosovës thotë se mbetet e përkushtuar në përpjekjet për luftimin e korrupsionit.
Por, zyrtarët e ekzekutivit nuk dëshirojnë t’i komentojnë detajet e deklaratës së shefit të ICO-së, Piter Feith, sipas të cilit, “Kosova nuk mund t'i afrohet Bashkimit Evropian pa e luftuar dhe pa e zhdukur të keqen e krimit të organizuar dhe korrupsionit”.
Në një prononcim për “Reuters”, Feith ka deklaruar po ashtu se, “Kosova ka nevojë të përmirësojë imazhin e saj, e për këtë qëllim është shumë e rëndësishme t’i heqë qafesh personalitetet e korruptuara”.
Lidhur me këto pohime, zëvendëskryeministri Hajredin Kuçi thotë se nuk i pëlqen t’i komentojë deklaratat e zyrtarëve të tjerë, por përsërit përkushtimin e Qeverisë për luftimin e krimit dhe korrupsionit.
“Unë, zakonisht, nuk i komentoj deklaratat e të tjerëve, por ajo çka dua të them është se Qeveria është e interesuar për të luftuar korrupsionin, krimin e organizuar dhe dukuritë tjera negative. Ne e marrim seriozisht çdo deklaratë për këto çështje”, thotë Kuçi.
Ndryshe nga zyrtarët qeveritarë shprehen liderët opozitarë. Kryetari i Aleancës për Ardhmërinë e Kosovës, Ramush Haradinaj, thotë se korrupsioni në institucionet e Kosovës fillon nga kryeministri Hashim Thaçi.
“Për bindjen time, korrupsioni fillon nga kryeministri Thaçi. Ai është shkaktar i korrupsionit; logjika e tij qeverisëse, dhe pasojat vazhdojnë në nivelet tjera”, transmetojnë burimet lokale kreun e AAK-së.
Sipas Haradinajt, pa involvimin e kryeministrit në korrupsion, do të ishte e pamundur që të korruptoheshin anëtarët e kabinetit. Duke mos e luftuar korrupsionin, Haradinaj thotë se institucionet po ndikojnë që të dëmtohet imazhi i vendit para bashkësisë ndërkombëtare.
“Ky dëm do të dyfishohet në rast se mekanizmat ndërkombëtarë duhet të veprojnë, ngase si mesazh që ne e dërgojmë në këtë rast në Bruksel, në Uashington, është se jo vetëm që ka korrupsion, por mekanizmat që duhet ta luftojnë atë janë të korruptuar, sepse nuk e luftojnë”, shprehet Haradinaj.
Po në lidhje me luftën kundër korrupsionit, edhe shtypi kosovar paralajmëron mundësinë që kryeministri Hashim Thaçi të shkarkojë të paktën njërin nga ministrat e kabinetit të tij, nën dyshimet për keqpërdorimin e, siç thuhet, dhjetëra miliona eurove, që mund të vijë si rrjedhojë e trysnive ndërkombëtare.
Por, edhe këto paralajmërime nuk janë komentuar nga ekzekutivi kosovar.