Me nismën e deputetit të pavarur në Kuvendin e Kosovës, Naim Rrustemi, janë mbledhur 31 nënshkrime të deputetëve, të cilët i kërkojnë Gjykatës Kushtetuese interpretimin në lidhje me mbajtjen e dy posteve nga presidenti Fatmir Sejdiu.
Ndonëse presidenti Sejdiu, që nga zgjedhja e tij në postin e kreut të shtetit, e ka ngrirë funksionin e kryetarit të Lidhjes Demokratike të Kosovës, ky veprim i tij, sipas deputetëve nënshkrues, nuk e arsyeton, siç thonë ata, shkeljen e Kushtetutës nga ana e presidentit.
Kësaj nisme të deputetëve u është përgjigjur sot vetë presidenti Sejdiu, duke thënë se është e drejtë e deputetëve të kërkojnë interpretimin e Gjykatës Kushtetuese. Por, ai është shprehur i bindur se nuk ka bërë kurrfarë shkeljeje të Kushtetutës.
Ndërkohë, ish-deputeti i Partisë Demokratike të Kosovës, tani në cilësinë e deputetit të pavarur, Naim Rrustemi, ka thënë se ai, bashkë me kolegët e tij nënshkrues, janë të bindur se Sejdiu ka shkelur Kushtetutën.
Ai ka deklaruar se bisedimet që bëhen në emër të LDK-së, në çështjet që kanë të bëjnë me vendimmarrjen, zhvillohen nga ana e Sejdiut dhe në emër të LDK-së.
“Të gjithë e dimë që bisedat rreth aktiviteteve politike janë të orkestruara nga një person, e ai është Fatmir Sejdiu, që është kryetar i LDK-së”, ka thënë Rrustemi.
...nuk është mirë që të jetë shembull i keq për Kushtetutën, sepse e minimizon ndikimin e tij në kërkesën për respektimin e Kushtetutës në tërë territorin e Kosovës.
Sipas tij, shkelja e Kushtetutës nga ana e presidentit të vendit po jep një shembull të keq dhe po minimizon thirrjet e tij drejtuar të tjerëve për respektimin e Kushtetutës së Republikës.
“Unë dëshiroj që ta shoh presidentin e Kosovës president. Ai është edhe president i imi dhe i gjithë neve... nuk është mirë që të jetë shembull i keq për Kushtetutën, sepse e minimizon ndikimin e tij në kërkesën për respektimin e Kushtetutës në tërë territorin e Kosovës”, ka thënë Rrustemi.
Dyshime në lidhje me shkeljen e Kushtetutës nga ana e presidentit Sejdiu janë shprehur që nga koha kur ai ka vendosur të mbajë postin e kryetarit të LDK-së, sado që ai ishte një post i ngrirë.
Në Kushtetutën e Kosovës shkruan se “presidenti është kreu i shtetit dhe përfaqëson unitetin e popullit të Republikë së Kosovës” dhe se ai “nuk mund të mbajë asnjë funksion tjetër publik”.
Sidoqoftë, është Gjykata Kushtetuese ajo e cila pritet të japë interpretimin përfundimtar në lidhje me dy postet e Sejdiut dhe vetëm atëherë do të sqarohet përfundimisht nëse është bërë shkelje apo jo e Kushtetutës së Kosovës nga ana e kreut të shtetit.
