Populli shqiptar ndihet krenar dhe i privilegjuar që nga gjiri i tij nxori një humaniste me përmasa kaq të mëdha botërore, tha të enjten kryetari i Kuvendit, Jakup Krasniqi, gjatë një seance solemne të Parlamentit të mbajtur në 100-vjetorin e lindjes së Nënës Terezë.
“Nëna jonë e madhe, me humanizmin e saj, me përkushtimin e dashurinë e saj mbinjerëzore bashkoi kombe e raca”, tha Krasniqi.
Deri në fund të jetës, Nëna Terezë me përkushtim i shërbeu njerëzimit, pa marrë parasysh se në cilën anë të globit jetonin, pa marrë parasysh se ç’gjuhë e kombe përfaqësonin, rikujtoi Krasniqi, duke shtuar se shëmbëlltyra e saj me shenjtërinë e saj edhe sot është në shërbim të të gjithëve, pa dallim.
“Populli ynë ndihet i privilegjuar dhe krenar për bijën e tij humaniste të këtyre përmasave, që ishte gruaja më e madhërishme e botës së shekullit XX”.
“Është një nder dhe një privilegj i madh për të gjithë ne, që jetuam në epokën e saj, e bëmë ndryshime të mëdha, që e patëm dhe e kemi përjetësisht një Gonxhe, të cilën mbarë bota e quan Nëna Terezë”, u shpreh Krasniqi.
Kryeparlamentari Krasniqi tha po ashtu se për të kuptuar shpirtin dhe veprën humanitare të Nënës Terezë duhet t’i bëhet fillimisht një këndvështrim edhe historisë, kulturës e traditës së popullit shqiptar.
Sipas Krasniqit, “vetëm atëherë mund ta zbërthejmë, ta kuptojmë dhe ta shpjegojmë fenomenin e mirësisë, të dashurisë dhe të shpirtit të madh të kësaj bije të kombit tonë”.
“Gonxhe Bojaxhiun – që në mbarë botën njihet me emrin Nëna Terezë, e lindi, e rriti dhe e madhëroi lashtësia jonë ilire–shqiptare, e nxori në dritë martirizimi ynë shumëshekullor për dashurinë njerëzore, e lartësoi përvujtëria dhe stoicizmi ynë i pashembullt, e bëri të madhe dhe të pavdekshme dashuria e pafund për njerëzimin, e veçanërisht për njerëzit në nevojë për një dorë të ngrohtë njerëzore”, tha Krasniqi.
Në seancë morën pjesë dhe personalitete të ndryshme vendase e ndërkombëtare. Ipeshkvi i Kosovës, Dodë Gjergji, falënderoi Kuvendin dhe institucionet që e nderuan veprën e humanistes së madhe Nëna Terezë me këtë seancë solemne.
Dëshiroj ta falënderoj Zotin për këtë mundësi që e kemi sot në Kosovën e pavarur, në Kosovën e lirë që edhe Parlamenti i shtetit të ri të Kosovës t’ia kushtojë këtë seancë nënës
së madhe...
“Dëshiroj ta falënderoj Zotin për këtë mundësi që e kemi sot në Kosovën e pavarur, në Kosovën e lirë që edhe Parlamenti i shtetit të ri të Kosovës t’ia kushtojë këtë seancë nënës së madhe, motrës sonë dhe bijës së kombit, Nënës Terezë – Gonxhe Bojaxhiut. Është një moment kur të gjithë shqiptarët po festojnë, jo vetëm sot, por gjatë gjithë këtij viti”, u shpreh Ipeshkvi Dodë Gjergji.
Viti 2010, nga presidenti Fatmir Sejdiu është shpallur viti i Nënës Terezë, andaj për nder të figurës dhe veprës së saj në Kosovë janë shënuar e po shënohen aktivitete të ndryshme.
Kurse, të dielën, më 5 shtator, do të përurohet dhe Katedralja në Prishtinë me emrin e humanistes së madhe, e cila, siç u tha në Parlamentin e Kosovës, me veprën e saj krijoi dhe shkroi historinë e padëgjuar ndonjëherë më parë.
