Besimtarët islamë po festojnë sot Kurban Bajramin me lutjet që paqja dhe mirëkuptimi të mbretërojnë te të gjithë njerëzit e Kosovës.
Si zakonisht, festa ka nisur me faljen e Bajramit. Ceremonia qendrore u mbajt në xhaminë “Sulltan Mehmet- Fatih” në Prishtinë.
Porosia e Kurban Bajramit qëndron fuqishëm mbi parimet e fisnikërisë, bujarisë, flijimit dhe sakrificës, pasi përveç tjerash është edhe kurorëzim i Haxhit, kushtit të pestë të Islamit, në të cilin demonstrohet uniteti, barazia, solidariteti, devotshmëria, tha me këtë rast kryeimami Sabri Bajgora.
Ai ftoi të gjithë që të tregojnë tolerancë e respekt për njeri tjetrin për të ndërtuar shtetin e Kosovës.
“Përfitoj nga rasti që nga ky vend i bekuar të ju ftoj që të kontribuojmë edhe më shumë për ndërtimin dhe fuqizimin e mëtutjeshëm të atdheut tonë, Kosovës. E kemi amanet nga krijuesi ynë fuqiplotë, që si qytetarë të japim kontributin tonë që në këtë vend të mbretërojë rendi, ligji e rregulli. Të ndërtojmë një shoqëri e cila do të respektojë vlerat qytetëruese të popullit të Kosovës, duke respektuar etninë, gjuhën, dhe besimin e çdo qytetari të saj”, tha Bajgora.
Me rastin e festës së Kurban Bajramit, besimtarët islamë i kanë uruar edhe udhëheqësit e institucioneve më të larta dhe ata të partive politike.
Presidentja e Kosovës Atifete Jahjaga, në urimin e saj thotë se “Festa e Bajramit të Vogël është ditë e besimit në Zotin, ditë e nderimit, mirëkuptimit e respektit për njëri-tjetrin, ditë e paqes dhe lumturisë së të gjithë njerëzve”.
Kurse, kryeministri Hashim Thaçi thotë se “kjo festë lartëson shpirtërisht besimtarët islamë kudo në botë, duke forcuar vlerat e besimit në Zot”.
“Festa e Kurban Bajramit e gjen Kosovën në rrugën e rritjes së mirëqenies për të gjithë qytetarët e saj, pa dallim feje dhe etnie, ku respektimi i të drejtave dhe lirive njerëzore janë kushte themelore të demokracisë së shtetit tonë të ri”, thuhet në urimin e Thaçit.
Thaçi nënvizon po ashtu se “Festa e Kurban Bajramit Kosovën e gjen si shoqëri me harmoni të plotë midis diversiteteve etnike, fetare dhe kulturore, duke respektuar vlerat universale, si kusht për integrim në institucionet euroatlantike.
