Kryetarja e KQZ-së, Valdete Daka hap vendvotimet
Nga ora 07:00 e mëngjesit, ka filluar hapja e vendvotimeve për zgjedhjet e parakohshme parlamentare në Kosovë.
Kryetarja e Komisionit Qendror të Zgjedhjeve, Valdete Daka ka hedhur e para votën. Me këtë rast ajo ka ftuar të gjithë qytetarët e Kosovës me të drejtë vote, që të votojnë dhe ta shfrytëzojnë të drejtën e tyre.
“I ftoj dhe komisionerët e partive politike që të mos e keqpërdorin detyrën e tyre dhe t’i tregojmë botës se ne dimë të organizojmë zgjedhje”, ka thënë Daka.
Rreth 200 pjesëtarë të OSBE-së në veri të Kosovës
Misioni i OSBE-së, në bashkëpunim me Komisionin Qendror të Zgjedhjeve ka shpërndarë 200 pjesëtarë të stafit në pjesën veriore të Kosovës, të banuar me shumicë serbe.
Kryetarja e KQZ-së, Valdete Daka ka thënë se ky staf ka rol këshillëdhënës.
“Dy persona janë për një vendvotim, por ata nuk kanë rol ekzekutiv dhe se janë aty vetëm për të këshilluar anëtarët e Komisioneve Komunale”, ka theksuar Daka.
Mbi 150 mijë votues të rinj në zgjedhje
Rreth 155 mijë votues të rinj, të cilët kanë mbushur 18 vjet, do të votojnë për herë të parë në zgjedhjet e parakohshme parlamentare të 11 qershorit.
Lista Përfundimtare e Votuesve, sipas KQZ-së, përmban 1 milion e 872 mijë e 941 emra të votuesve.
Ftohen qytetarët të raportojnë parregullsitë
Fondacioni i Kosovës për Shoqëri të Hapur në bashkëpunim me Institutin Columbus, përmes fushatës “Voto dhe Vëzhgo”, fton qytetarët që të lajmërojnë çdo parregullsi që shohin gjatë ditës së votimit, duke dërguar SMS falas në numrin 500 88.
Facebook Forum