Ndërlidhjet

Paralajmërohen gjoba për shkelësit e masave kundër koronavirusit në Kosovë


Prishtinë
Prishtinë

Kryetari i Komunës së Prishtinës, Shpend Ahmeti, paralajmëroi se personat që nuk i respektojnë rregullat dhe vendimet për parandalimin e koronavirusit do të gjobiten.

Duke u thirrur në nenin 53.1 të Ligjit për parandalimin dhe luftimin e sëmundjeve ngjitëse, gjobat, sipas tij, do të jenë nga 1,000 deri në 2,000 euro për personat fizikë dhe nga 3,000 deri në 8,000 euro për personat juridikë.

"Sot kemi pranuar qarkoren informative nga niveli qendror, lidhur me gjobat për mosrespektim të urdhëresave dhe vendimeve në kuadër të masave për parandalimin e shpërndarjes së virusit", tha Ahmeti përmes një postimi në Facebook.

Ai i ftoi qytetarët që t’i zbatojnë masat, duke shtuar se "kohë për vërejtje, diskutim e mirëkuptim, nuk ka".

Qeveria tashmë në detyrë e Kosovës ka shpallur gjendje emergjente për shëndetin publik, pak kohë pas shfaqjes së rasteve të para me koronavirus, më 13 mars.

Në mesin e masave të ndërmarra, si mbyllja e shkollave dhe e restoranteve, është edhe ndalimi i lëvizjes së qytetarëve nga ora 17:00 deri në orën 06:00.

Në Kosovë, deri më tash janë konfirmuar 170 raste me koronavirus.

Prej tyre, katër kanë vdekur, 24 janë shëruar.

Nga radhët e komunitetit serb, janë infektuar 33 persona, ndërsa një ka vdekur.

Komuniteti serb i raporton rastet në Serbi.

XS
SM
MD
LG