Ndërlidhjet

Blogu i pandemisë COVID-19

Raste të të infektuarve me koronavirus kanë raportuar mbi 180 vende. Përcilleni Radion Evropa e Lirë për informacionet e reja.


Përmbledhja

Koronavirusi i ri, që është një familje e gjerë virusesh, është shfaqur për herë të parë në Kinë, në fund të vitit 2019.

  • Shenjat kryesore të infektimit me të janë: temperatura e lartë, kolla dhe vështirësitë në frymëmarrje.
  • Sëmundja që shkakton koronavirusi, është emëruar COVID-19.
  • Përveç Kinës, raste me koronavirus kanë raportuar edhe mbi 180 vende të tjera të botës.
  • Sipas të dhënave të Universitetit Johns Hopkins, në gjithë botën janë: 5,813,997 njerëz të infektuar, 360,389 të vdekur dhe 2,351,355 të shëruar.
  • Shtetet e Bashkuara kanë 1,721,750 raste të prekura me koronavirus dhe 101,617 të vdekur.
  • Pas tyre vjen Mbretëria e Bashkuar me 37,919 viktima.
  • Kosova ka konfirmuar rastet e para me koronavirus më 13 mars.
  • Koronavirusi vjen nga një familje virusesh që mban emrin e dukjes së tij, sepse ka formën e një kurore.
  • Nga i njëjti grup virusesh vijnë edhe SARS dhe MERS - viruse që kanë shkaktuar epidemi në të kaluarën.
  • Rekomandimet e Organizatës Botërore të Shëndetësisë (OBSH) për të parandaluar përhapjen e koronavirusit janë: larja e rregullt e duarve, mbulimi i gojës dhe hundës gjatë kollitjes dhe teshtitjes, gatimi i plotë i mishit dhe vezëve dhe shmangia e kontaktit të ngushtë me personat që tregojnë simptoma të sëmundjeve të frymëmarrjes, si kollitje dhe teshtitje.
  • OBSH-ja e ka shpallur pandemi sëmundjen që shkakton koronavirusi, COVID-19.
  • Pandemia ndodh kur një sëmundje infektive përhapet lehtësisht nga personi në person, në shumë pjesë të botës.
16:11 29.5.2020

Të dashur lexues, këtu e mbyllim mbulimin e drejtpërdrejtë të pandemisë së koronavirusit. Për më të rejat e fundit na ndiqni në rubrikën e lajmeve. Faleminderit që ishit me ne!

15:14 29.5.2020

Shkup: Katër të vdekur dhe 52 të infektuar me koronavirus

Maqedonia e Veriut ka regjistruar të premten katër të vdekur nga Covid-19.

Sipas njoftimit të Ministrisë së Shëndetësisë, tre viktima janë nga Shkupi, të moshës 73,76 dhe 82 vjeçe dhe një tjetër nga Tetova i moshës 55 vjeçe.

Me këto viktima numri i përgjithshëm i atyre që kanë humbur betejën me Covid-19 ka arritur në 125.

Janë regjistruar edhe 52 të infektuar me koronavorirus, shifër kjo më e larta që nga muaji prill, kur vendi ndodhej pranë majës së epidemisë.

Numri më i madh i të infektuarve është në Shkup, gjithsej 26 raste, 9 në Tetovë, 6 në Kumanovë, 2 në Strugë dhe nga një në Veles dhe Koçanë. Të dhënat kanë të bëjnë me testimin e 661 mostrave në rajone të ndryshme të vendit.

Drejtuesit e institucioneve kanë shprehur brengosje të thellë lidhur me rritjen e numrit të të infektuarve duke bërë thirrje për kujdes të shtuar.

Ministri i Shëndetësisë, Venko Filipçe ka thënë se mos respektimit i masave mund të çoj në rikthimin e masave kufizuese.

“Dua të bëjë qartë se do të zbatojmë kufizime në disa vende nëse gjendja epidemiologjike e kërkon një gjë të tillë, do të analizojmë të dhënat edhe gjatë fundjavës dhe do të shohim se si duhet të veprojmë”, deklaroi Filipçe duke kërkuar nga Ministria e Punëve të Brendshme angazhim më të madh në zbatimin e masave të Komisionit të Sëmundjeve Infektive.

Numri i të infektuarve me koronavirus në Maqedoninë e Veriut ka shkuar në mbi 2,100 ndërsa 487 raste ende janë aktiv, kurse mbi 1,500 janë shëruar.

15:05 29.5.2020

Kroacia nuk shënon asnjë rast të ri me COVID-19

Gjatë 24 orëve të fundit në Kroaci nuk është shënuar asnjë rast i ri me COVID-19, sëmundja që shkaktohet nga koronavirusi i ri.

Numri i përgjithshëm i personave të infektuar me koronavirus, që nga fillimi i pandemisë mbetet 2445.

Të enjten, Shtabi i Mbrojtjes Civile raportoi se është shënuar edhe një vdekje e re.

Autoritetet shëndetësore njoftojnë se që nga fillimi i epidemisë janë shëruar 2,059 pacientë.

14:45 29.5.2020

Greqia do të rihapë kufijtë për 29 vende

Greqia njoftoi të premten se duke filluar nga data 15 qershor do të rihapë kufijtë për qytetarët e 29 vendeve të botës.

Në mesin e vendeve janë: Maqedonia e Veriut, Shqipëria, Serbia, Mali i Zi dhe Kroacia.

Lista do të zgjerohet edhe me disa vende tjera, tha ministria e Turizmit në Greqi.

Megjithatë, autoritetet kanë thënë se do të vëzhgojnë situatën e pandemisë.

Vizitorët do ti nënshtrohet testimin për koronavirusi por vetëm me raste sporadike.

Turizmi në Greqi luan një rol të rëndësishëm në ekonomi pasi rreth 20 për qind e e buxhetit mbushet nga të hyrat e kësaj industrie.

Rreth 33 milionë turistë e vizituan Greqinë vitin e kaluar, duke gjeneruar të ardhura prej 19 miliardë eurosh.

Masat e izolimit që u vendosen në muajin mars, ndihmuan mbajtjen nën kontroll të përhapjes së koronavirusit të ri.

Greqia ka raportuar për 3 mijë raste të infektuarve, një numër relativisht i ulët krahasuar me shumicën e vendeve anëtare të BE-së.

Trego më shumë

XS
SM
MD
LG