Deputetja e Partisë Demokratike të Kosovës (PDK), Besa Ismaili e ka dërguar në Gjykatën Kushtetuese vendimin e fundit të Ministrisë në detyrë të Shëndetësisë për kufizim te lëvizjes së qytetarëve.
“PDK së bashku me disa deputetë të pavarur dhe deputetë të grupeve tjera parlamentare ka parashtruar sot këtë kërkesë. Çështja që kemi ngritur është çështje e përputhshmërisë së vendimeve të Ministrit në detyrë të Shëndetësisë, Arben Vitia dhe përputhshmërisë me Kushtetutën e Kosovës”.
“Ne pretendojmë që ka një shkelje të dy neneve kryesore të lirisë së lëvizjes, nenit 35 të Kushtetutës së Kosovës dhe nenit 55, i cili përkufizon se këto vendime të kufizimit të lirisë së lëvizjes nuk i takojnë qeverisë”, ka deklaruar Ismaili.
Më qëllim të parandalimit të përhapjes së sëmundjes Covid-19, që shkakton koronavirusi, të mërkurën në Kosovë kanë hyrë në fuqi masat e reja të qarkullimit të qytetarëve.
Bazuar në masat e vendosura nga Ministria në detyrë e Shëndetësisë, qytetarët mund të dalin nga shtëpitë e tyre vetëm për 90 minuta në ditë, me qëllim furnizimi.
Orari i daljes është i organizuar në shtatë grupe, nga ora 07:00 deri në 22:30, dhe përcaktohet nga numri i parafundit personal në letërnjoftim.
Këto masa do të vlejnë deri më 4 maj, porse do të shqyrtohen në varësi të rezultateve, jo më vonë se data 30 prill.
Në bazë të të dhënave të fundit, në Kosovë janë gjithsej 449 raste të të infektuarve me koronavirus, 12 raste të vdekjes dhe 79 të shëruar.
- Për më shumë lajme rreth koronavirusit vizitoni blogun e Radios Evropa e Lirë.
