Ndërlidhjet

Përplasje rreth organizimit të faljes në sheshin e Prishtinës


Falja në sheshin "Skendërbe".

Disa të rinj myslimanë në Prishtinë, janë mbledhur të martën në sheshin ‘Skenderbe’ dhe janë falur.

Këtë e kanë bërë në shenjë proteste për moshapjen e xhamive. Pas lehtësimit të masave të izolimit dhe hapjes së shumë bizneseve, këta besimtarët myslimanë, po kërkojnë edhe hapjen e xhamive, të cilat u mbyllën si pasojë e përhapjes së koronavirusit të ri.

Falja në shesh si shenjë proteste
Ju lutem të prisni

No media source currently available

0:00 0:01:18 0:00

Përmes një organizimi në rrjetin social, Facebook, ata kanë bërë thirrje që të dalin në ora 16:30 në sheshin ‘Skenderbe’, afër ndërtesës së Qeverisë së Kosovës.

“Në shenjë pakënaqësie për moshapjen e dyerve të xhamive edhe pas fillimit të fazës së dytë të masave lehtësuese nga qeveria, një grup qytetarësh i jemi drejtuar me një kërkesë organeve gjegjëse për hapjen e xhamive dhe kryerjen e namazit me disa kushtëzime konform situatës epidemiologjike”, është thënë në njoftimin e grupit ‘Falu n’shesh’.

Lidhur me këtë ka reaguar Ministri në detyrë i Punëve të Brendshme, Xhelal Sveçla.

Sipas tij prapa këtij organizimi, qëndron publicisti Milazim Krasniqi.

“Jam informuar se sot pasdite, një grup ‘qytetarësh anonimë’ po nxit organizimin e një proteste që është kundër vendimeve të MSh-së të marra sipas rekomandimeve të IKSHP-së, dhe në dakordim të plotë me Bashkësinë Islame të Kosovës. Kemi gjithashtu informacione se pas këtyre organizimeve qëndron publicisti Milazim Krasniqi. I ftoj të gjithë qytetarët të tregojnë maturinë dhe vullnetin e plotë për të mos rënë viktimë e politizimit të riteve fetare”, ka shkruar Sveçla në Facebook.

I menjëhershëm ka qenë reagimi i profesorit Milazim Krasniqi, i cili po ashtu në Facebook, ka shkruar se deklarata e Sveçles, është gënjeshtër.

“Deklarata e Xhelal Sfeçlës se gjoja unë qëndroj pas ndonjë thirrjeje për të falë namaz në shesh është qind për qind gënjeshtër. Është e pakuptueshme dhe e turpshme që të gënjejë në këtë mënyrë një zyrtar i lartë i qeverisë. Asnjë thirrje të tillë, asnjë organizim të tillë nuk kam ftuar, as nxitur asnjëherë”, ka shkruar Krasniqi, i cili është deklaruar pro hapjes së xhamive.

Gjatë së martës, në një konferencë për media, kryetari i Bashkësisë Islame të Kosovës, Naim Tërnava, ka thënë se ende nuk janë krijuar kushtet për hapjen e xhamive dhe për faljen në xhami.

“Ende nuk janë krijuar kushtet për hapjen e xhamive në Kosovë. Kështu janë mendimet e ekspertëve të kësaj fushe. Unë nuk e njoh këtë sëmundje, por këta kolegët që i kam pranë kanë punuar ditë e natë për ne. Ne do të shohim për mundësinë e parë për t’i hapur shtëpitë e Zotit”, u shpreh Tërnava.

Pas konfirmimit të rasteve të para me koronavirus, në Kosovë u ndaluan të gjitha tubimet fetare, përfshirë këtu falja në xhami dhe ceremonitë e varrimeve.

Në Kosovë janë konfirmuar gjithsej 988 raste me koronavirus.

Prej tyre, 754 janë shëruar dhe 29 kanë vdekur.

XS
SM
MD
LG