Protestuesit në Zubin Potok shpërndahen; në Zveçan e Leposaviq vazhdon protesta
Në Zveçan thonë se qytetarët nuk do të largohen derisa të largohet Policia e Kosovës.
Dhjetëra protestes mbeten edhe para objektit komunal në Leposaviq.
Automjetet e policisë mbeten të bllokuara në Zveçan
Pjesëtarë të KFOR-it janë duke kërkuar nga përfaqësuesit e Listës Serbe që t'u mundësojnë tri automjeteve të Policisë së Kosovës, të parkuara para ndërtesës komunale në Zveçan, të lëvizin, dhe policëve që janë brenda, të hyjnë në ndërtesën e komunës.
Një gjë të tillë janë duke e kundërshtuar protestuesit serbë, të cilët kërkojnë nga Policia e Kosovës që të largohet nga kjo zonë.
Autoritetet e Kosovës e refuzojnë këtë kërkesë.
Policët në automjete gjenden aty që prej orëve të hershme të mëngjesit.
Lista Serbe në negociata me KFOR-in: Policia e Kosovës të zëvendësohet nga KFOR-i
Përfaqësuesit e Listës Serbe, Igor Simiq dhe Dragisha Milloviq, biseduan me kolonelin e paqeruajtësve amerikanë të KFOR-it në Zveçan dhe kërkuan që policët e Kosovës në këtë komunë të zëvendësohen nga KFOR-i.
Situata në Zveçan, Leposaviq dhe Zubin Potok mbetet e tensionuar, pasi grupe serbësh lokalë janë mbledhur para objekteve komunale për të kundërshtuar kryetarët e rinj shqiptarë.
"Mund të them se ka qenë vërtet një bisedë korrekte, se koloneli e kupton situatën në të cilën jemi të gjithë. Kërkesa jonë ka qenë që njësitë speciale të tërhiqen nga ndërtesa e komunës, të largohen nga ndërtesa e komunës dhe sigurinë ta marrë KFOR-i. Ai [koloneli] po flet tani me komandantin e përgjithshëm të KFOR-it për kërkesën tonë", tha Milloviq para të të tubuarve.
"Presim përgjigje se çfarë do të na thotë koloneli amerikan i KFOR-it", shtoi ai.
Kurti: Gjendja e tanishme kërkon të qetësohet situata në veri
Kryeministri i Kosovës, Albin Kurti, tha se gjendja e tanishme kërkon që të zbatohet Marrëveshja Bazë për normalizimin e marrëdhënieve Kosovë-Serbi, si dhe të qetësohet situata në veri të Kosovës.
Përmes një postimi në Twitter, Kurti tha se i ka bërë këto komente gjatë një bisede telefonike me ministrin e Jashtëm Italian, Antonio Tajani.
Ai nuk dha detaje të tjera.
Tensionet në veri të Kosovës janë rritur, pasi grupe të serbëve lokalë janë duke protestuar kundër kryetarëve të rinj shqiptarë të komunave: Zveçan, Zubin Potok dhe Leposaviq.
Të premten e kaluar, Policia e Kosovës ka hyrë me forcë në këto komuna për t’i instaluar kryetarët e rinj.
Përleshjet me protestuesit serbë kanë rezultuar me pesë policë të plagosur dhe disa makina të djegura.
Kurti i ka mbrojtur veprimet e policisë, ndërsa bashkësia ndërkombëtare i ka dënuar ashpër ato, duke paralajmëruar se minimizojnë përpjekjet për normalizimin e marrëdhënieve Kosovë-Serbi.