Kryeministrja e Italisë: Sulmet ndaj KFOR-it s’do të tolerohen
Kryeministrja e Italisë, Giorgia Meloni, tha se sulmet e mëtejshme kundër KFOR-it nuk do të tolerohen.
Ajo i bëri këto komente pas njoftimit se rreth 25 ushtarë të misionit paqeruajtës të NATO-s janë plagosur gjatë protestës së dhunshme të disa qytetarëve serbë para ndërtesës së komunës së Zveçanit.
Ushtarët e plagosur janë nga kontingjenti italian dhe ai hungarez.
“Unë dënoj fuqishëm sulmin ndaj misionit të KFOR-it, i cili preku edhe ushtarë nga kombet e tjera. Kjo që po ndodh, është absolutisht e papranueshme dhe e papërgjegjshme”, shkroi Meloni në Twitter.
Ajo u bëri thirrje autoriteteve kosovare që t’i “shmangin veprimet e njëanshme” dhe kërkoi nga të gjitha palët e përfshira që “të tërhiqen menjëherë dhe të kontribuojnë në uljen e tensioneve”.
“Qeveria italiane është plotësisht e përkushtuar për paqen dhe stabilitetin në Ballkanin Perëndimor dhe ne do të vazhdojmë të punojmë me aleatët tanë”, tha Meloni, teksa shprehu mirënjohje për ushtarët italianë që ndodhen në Kosovë.
Vuçiq bisedon me zyrtarët evropianë për situatën në Kosovë
Presidenti i Serbisë, Aleksandar Vuçiq, tha se ka biseduar në telefon me përfaqësuesin e lartë të Bashkimit Evropian për politikë të jashtme dhe siguri, Josep Borrell, dhe me zëvendëspresidentin e Këshillit të Ministrave, Antonio Tajani, njëherësh ministër i Jashtëm i Italisë.
Vuçiq tha se i ka njoftuar bashkëbiseduesit për “gjithçka që po ndodh në Kosovë”, duke iu referuar zhvillimeve në veri të vendit.
Ai tha se gjithë këtë “e ka organizuar” kryeministri i Kosovës, Albin Kurti, dhe kërkoi nga zyrtarët evropianë që të bisedojnë me të.
Vuçiq tha se Serbia dhe serbët do të bëjnë gjithçka për të ruajtur paqen dhe stabilitetin, thuhet në njoftimin e publikuar në ueb-faqen e Presidencës serbe.
Zhvillimet në veri në dy minuta
Fillimisht gaz lotsjellës e më pas dhunë. Kështu është karakterizuar e hëna e 29 majit në tri komunat në veri të Kosovës, me shumicë serbe: Zveçan, Zubin Potok dhe Leposaviq. Atje, serbët lokalë kanë protestuar kundër hyrjes së kryetarëve të rinj shqiptarë në ndërtesat komunale.
Ushtarë të KFOR-it transferohen për trajtim në Prishtinë
Disa ushtarë të KFOR-it, të plagosur në përleshjet me protestuesit serbë në Zveçan, u transferuan për trajtim në Spitalin Amerikan në Prishtinë.
Misioni paqeruajtës i NATO-s bëri të ditur për së paku 25 ushtarë të plagosur.
