Rusia: Perëndimi të mos fajësojë serbët
Rusia tha të martën se për t'i ulur tensionet në Kosovë, duhen "hapa vendimtarë".
“Ne i bëjmë thirrje Perëndimit që përfundimisht ta ndalë propagandën e tij të rreme dhe, për incidentet në Kosovë, të ndalojë së fajësuari serbët, të cilët janë paqësorë, të paarmatosur dhe bëjnë përpjekje t’i mbrojnë të drejtat dhe liritë e tyre legjitime”, tha Ministria e Jashtme e Rusisë, transmeton Reuters.
Protestuesit serbë u përplasën të hënën me paqeruajtësit e KFOR-it në Zveçan.
Tridhjetë ushtarë të KFOR-it dhe mbi 50 protestues u plagosën në përleshje.
KFOR-i tha se tre ushtarë të tij janë plagosur nga përdorimi “i armëve të zjarrit” gjatë përplasjeve me protestuesit serbë.
Një ditë më herët, ministri i Jashtëm i Rusisë, Sergei Lavrov, tha se situata në Kosovë është alarmante dhe se mund të provokojë një tjetër konflikt në qendër të Evropës.
Rusia, e cila ka nisur pushtimin e fqinjit të saj, Ukrainës, në shkurt të vitit të kaluar, është aleate e Serbisë dhe mbështet vazhdimisht veprimet e saj kundër shtetësisë së Kosovës.
Pamje nga Leposaviqi
Një numër i vogël i qytetarëve serbë janë tubuar të martën e 30 majit para ndërtesës së Komunës së Leposaviqit, për të protestuar për të dytën ditë rresht kundër kryetarit të ri shqiptar.
Lista Serbe përsërit kërkesat e njëjta: “U qëndrojmë atyre”
Sërgjan Millosavleviq, nga partia më e madhe e serbëve në Kosovë, Lista Serbe, u tha qytetarëve të mbledhur në Zveçan se kërkesat e komunitetit serb në këtë zonë, nuk kanë ndryshuar.
Ai kujtoi se kërkesat lidhen me tërheqjen e njësisë speciale të Policisë së Kosovës nga komunat në veri, si dhe me moshyrjen e kryetarëve shqiptarë në ndërtesat e komunave atje.
“Ne u qëndrojmë këtyre kërkesave”, si kusht për ndaljen e protestave, tha Millosavleviq, ish-kryetar i Kuvendit Komunal të Zveçanit.
Millosavleviq, po ashtu, tha se komuniteti serb kërkon lirimin e dy qytetarëve serbë, Radosh Petroviq dhe Dushan Obrenoviq, të arrestuar gjatë dhunës së një dite më herët.
“Nëse nuk lirohen, le të mblidhemi në të gjitha komunat në numër edhe më të madh se dje dhe, në mënyrë paqësore, ta shprehim pakënaqësinë tonë për situatën”, tha Millosavleviq.
Borrell: Kosova t'i pezullojë operacionet e policisë rreth komunave në veri
Kosova duhet t'i pezullojë operacionet e policisë së saj rreth ndërtesave të komunave në veri të vendit, si hap i parë për uljen e tensioneve, tha shefi i politikës së jashtme të BE-së, Josep Borrell.
"Dua të them se BE-ja e dënon fuqishëm dhunën në veri të Kosovës, që e kemi parë ditëve të fundit. Aktet e dhunës ndaj qytetarëve, mediave, forcave të rendit dhe KFOR-it janë të papranueshme", tha Borrell për gazetarët në Bruksel.
"Ne, si BE, qëndrojmë prapa NATO-s dhe KFOR-it në përmbushjen e mandatit, në interes të paqes dhe stabilitetit në Kosovë", shtoi ai.
Borrell tha se ka biseduar edhe me kryeministrin e Kosovës, Albin Kurti, edhe me presidentin e Serbisë, Aleksandar Vuçiq, dhe se i ka ftuar ata që "ta qetësojnë situatën menjëherë dhe pa kushte".
Ai, po ashtu, tha se BE-ja pret që palët të angazhohen në dialog dhe ta hapin rrugën për zbatimin e Marrëveshjes drejt normnalizimit të marrëdhënieve.
