Qetësohet situata në Mitrovicë të Veriut

Ministri i Punëve të Jashtme i Serbisë, Ivica Daçiq, tha se “të gjithë duhet të bashkohen rreth mbrojtjes së popullit serb” në Kosovë.

Sipas tij, çështjet e brendshme politike nuk duhet të ndikojnë në gatishmërinë e Serbisë "për të mbrojtur popullin e saj".

"Duhet të bëjmë gjithçka për të ndihmuar mbijetesën e popullit tonë në Kosovë. Duhet të jemi të vetëdijshëm se do të kalojmë nëpër beteja të vështira, politike dhe të sigurisë", tha Daçiq për televizionin Pink të Beogradit.

Shefi i diplomacisë serbe vlerësoi se kryeministri i Kosovës, Albin Kurti “nuk do normalizim, por përshkallëzim dhe konflikt” dhe se qëllimi i tij është “t’i dëbojë serbët nga Kosova”.

Daçiq nuk solli ndonjë provë për këto pretendime.

Presidenti i Serbisë, Aleksandar Vuçiq, tha se nuk do të shkojë në Bratisllavë, sepse “është më e rëndësishme për të që të jetë me njerëzit e tij”.

Vuçiq i bëri komentet në llogarinë e tij zyrtare në Instagram.

Burime të BE-së e përmendën Bratisllavën si vend të mundshëm takimi mes kryeministrit të Kosovës, Albin Kurti, dhe presidentit të Serbisë, Aleksandar Vuçiq.

Ato thanë se nuk ka asgjë të konfirmuar, por se po punojnë në këtë drejtim.

Në Bratisllavë, aktualisht, po mbahet një takim për sigurinë dhe Kurti e Vuçiq kanë qenë të ftuar.

Nga kabineti i Kurtit thanë më herët për REL-in se shkuarja e tij në Bratisllavë ka qenë e planifikuar, por është shtyrë, për shkak të zhvillimeve në veri të Kosovës.

SHIKONI EDHE:

Vuçiq anulon shkuarjen në Bratisllavë, Kurti pa vendim definitiv

Përmes postimit në Instagram, Vuçiq, po ashtu, tha se do t’i vizitojë ushtarët e dislokuar serbë në pozicione pranë kufirit me Kosovën.

Vuçiq ka dhënë urdhër për rritjen e gatishmërisë luftarake të ushtrisë serbe dhe për dislokimin e trupave më pranë kufirit, pasi Qeveria e Kosovës, javën e kaluar, ka instaluar kryetarët e rinj shqiptarë në komunat me shumicë serbe në veri të vendit.

Ky veprim ka nxitur protesta në veri të Kosovës.

Për ju që sapo na jeni bashkuar:

• Trupa të NATO-s janë duke siguruar ndërtesën komunale në Zveçan, ku një ditë më parë 30 ushtarë të NATO-s dhe mbi 50 protestues serbë u plagosën në përleshje.
• Ushtarë të KFOR-it gjenden edhe përreth objekteve komunale në Zubin Potok dhe Leposaviq.
• Në të tria këto komuna me shumicë serbe, protestat kundër kryetarëve shqiptarë janë duke vazhduar edhe sot, ndonëse me një numër më të vogël të të tubuarve.
• Burime të BE-së thonë se po bëhen përpjekje për të organizuar një takim mes kryeministrit të Kosovës, Albin Kurti, dhe presidentit të Serbisë, Aleksandar Vuçiq, të mërkurën në Bratisllavë.
• Shefi i politikës së jashtme të BE-së, Josep Borrell, e dënoi dhunën në veri “në termat më të fuqishëm të mundshëm” dhe kërkoi nga Kosova që t’i pezullojë operacionet e policisë së saj rreth ndërtesave komunale atje.
• Vuçiq takoi ambasadorët e vendeve të Quint-it, nga të cilët kërkoi ta bindin Kurtin që t’i tërheqë forcat speciale të policisë nga veriu i Kosovës, ashtu si edhe kryetarët shqiptarë të katër komunave me shumicë serbe në këtë zonë.
• Nga Qeveria e Kosovës, tash për tash, nuk ka ndonjë deklaratë.