Hovenier i ka treguar Kurtit “sa serioze është situata”
Ambasadori amerikan, Hovenier, ka thënë se ka biseduar me kryeministrin e Kosovës, Albin Kurti, sa serioze e konsideron situatën në veri.
“Ne jemi këtu, së bashku, që unë të theksoj sa serioze është situata, dhe i kam thënë edhe kryeministrit sa serioze është”.
Deklaratat tjera të ambasadorit, i gjeni në linkun më poshtë:
Hovenier dënon sulmet ndaj pjesëtarëve të KFOR-it
Përgjatë bisedës me gazetarët në Prishtinë, ambasadori amerikan në Prishtinë, Jeffrey Hovenier, ka thënë se është i shqetësuar për plagosjen e ushtarëve të KFOR-it në veri, dhe i dënon sulmet ndaj tyre.
“Por kjo nuk e mohon faktin që arsye se pse ushtarët kanë qenë aty, për ta ruajtur paqen në atë skenar, ka qenë vendimi i marrë nga Kurti për të tentuar që të sigurojë qasje në tri ndërtesat komunale, përmes forcës. Ky është vendimi që duhet të adresohet sa u përket uljes të tensioneve, dhe ne po kërkojmë diçka të tillë”.
Sipas Hovenierit, ulja e tensioneve në veri ka prioritet, e më pas zbatimi i Marrëveshjes për normalizim të marrëdhënieve mes Kosovës dhe Serbisë.
“Të dyja palët duhet ta zbatojnë atë në tërësi. Diçka e tillë është zgjidhje për veriun. Kjo është një prej arsyeve pse ne i kërkojmë Qeverisë që me urgjencë të ecë përpara në procesin e negociatave për Asociacionin, i cili do të ndihmojë për shumë aspekte që ekzistojnë në veri”.
Sulmohet vetura me ekipin e REL-it në Zubin Potok
Një taksi me të cilën po udhëtonte një ekip i Radios Evropa e Lirë është sulmuar në Zubin Potok, komunë në veri të Kosovës, e banuar me shumicë serbe.
Nga ky sulm, që ndodhi teksa vetura ishte në lëvizje, asnjëri nga pjesëtarët e ekipit të REL-it nuk ka pësuar lëndime.
Vetura është sulmuar pasi gazetarët e REL-it hipën në të, kur përfundoi protesta e serbëve në këtë komunë, pak pas orës 15:00.
Banorët lokalë, pjesëmarrës të protestës, sulmuan veturën me një mjet shpërthyes.
Pavarësisht se nuk dihet se me çfarë mjeti është sulmuar vetura, gazetarët thanë se shpërthimi ishte i fuqishëm.
Ekipet e gazetarëve të mediumeve të ndryshme, që kanë raportuar nga veriu i Kosovës lidhur me protestat e banorëve lokalë, kanë qenë cak i disa sulmeve më 30 maj, ka raportuar gjatë ditës Asociacioni i Gazetarëve të Kosovës.
Serbët kanë protestuar të martën edhe në Zveçan dhe Leposaviq, duke kundërshtuar kryetarët e rinj shqiptarë dhe duke kërkuar tërheqjen e njësive speciale të Policisë së Kosovës.
Hovenier deklarohet për qasjen e Osmanit ndaj situatës në veri
I pyetur nëse presidentja e Kosovës, Vjosa Osmani, është pjesë e politikave qeveritare, nëse Kurti dhe Osmani punojnë si ekip, ambasadori Hovenier, ka thënë se nuk i takon të flasë për këto dinamika brenda institucioneve.
Megjithatë, Hovenier ka përmendur se Osmani e ka theksuar rëndësinë e bashkëpunimit të ngushtë me komunitetin ndërkombëtar, në veçanti me Shtetet e Bashkuara.
“Besoj se kjo është diçka që ajo e trajton me seriozitet”.