Vuçiq diskuton me Erdoganin për situatën në rajon
Presidenti i Serbisë, Aleksandar Vuçiq, ka biseduar në telefon me presidentin turk, Recep Tayyip Erdogan, dhe e ka uruar atë për fitoren në zgjedhje.
Në deklaratën e lëshuar nga Presidenca e Serbisë, është theksuar se Erdogan është interesuar për situatën në Kosovë, dhe se Vuçiq e ka informuar për ngjarjet.
“Ai, po ashtu, i ka kërkuar kreut turk që ta përdorë reputacionin e shtetit të tij, dhe ndikimin, ashtu që paqja dhe stabiliteti të triumfojnë në rajon”, është thënë në deklaratë.
Gazetarë shqiptarë e serbë mbrojnë pronarin e kafenesë që u hapi derën
Gazetarë shqiptarë dhe serbë i dolën në mbrojtje Mlladen Peroviqit nga Zveçani, i cili gjatë trazirave në këtë qytet ua hapi derën e kafenesë së tij, por që më vonë u etiketua si “tradhtar”.
“Unë nuk e di se çfarë kam bërë për të qenë tradhtar dhe për t'u vënë në shënjestër”, tha të mërkurën Peroviq për mediat në Zveçan - komunë e banuar me shumicë serbe në pjesën veriore të Kosovës.
Zveçani, prej ditësh, është në qendër të tensioneve, të cilat kulmuan më 29 maj, kur grupe protestuesish serbë u përplasën me pjesëtarë të misionit paqeruajtës të NATO-s, KFOR.
Në artikullin më poshtë mund t’i lexoni përjetimet e gazetarëve që kanë qenë në skenën e trazirave të hënën në Zveçan.
KFOR-i patrullon rrugëve të Zveçanit
Ekipi i Radios Evropa e Lirë i ka parë disa patrulla të KFOR-it amerikan në rrugët e Zveçanit, në pasditen e së mërkurës.
Edhe kryetari i Listës Serbe – partisë më të madhe të serbëve në Kosovë – Goran Rakiq, ia ka bërë KFOR-it kërkesën për patrullim nëpër rrugë, pak orë më parë.
Sipas tij, arsye për këtë kërkesë është që “Policia e Kosovës të mos afrohet dhe të ngrejë tensione”.
Pas përleshjeve të së hënës, mes protestuesve serbë dhe pjesëtarëve të KFOR-it në këtë komunë, pjesëtarët e misionit paqeruajtës janë parë vetëm afër objektit komunal.
Ministri serb viziton një pjesë të forcave aktive të ushtrisë serbe
Ministria e Mbrojtjes e Serbisë ka raportuar se, zëvendëskryeministri dhe ministri i Mbrojtjes i Serbisë, Millosh Vuçeviq, e ka vizituar më 31 maj një pjesë të forcave aktive të Forcave të Armatosura të Serbisë. Presidenti serb, Aleksandar Vuçiq, ka dhënë ditë më parë urdhër për ngritjen e gatishmërisë luftarake të ushtrisë serbe në nivelin më të lartë, për shkak të situatës në Kosovë.
