Lista Serbe e dënon masën e paraburgimit ndaj dy të arrestuarve në Zveçan
Lista Serbe – partia më e madhe e serbëve në Kosovë – e ka dënuar vendimin e Gjykatës Themelore në Prishtinë për masën e paraburgimit ndaj dy personave të arrestuar në Zveçan.
Ata dyshohet se kane qenë pjesë e përleshjeve mes protestuesve serbë dhe pjesëtarëve të KFOR-it në atë komunë.
Lista Serbe i ka identifikuar dy të arrestuarit si Radosh Petroviq dhe Dushan Obrenoviq.
Sipas Prokurorisë, ata dyshohen se kanë kryer veprat penale “bashkimi për veprimtari kundër kushtetuese, me qëllim të sulmit kundër rendit kushtetues të Republikës së Kosovës, “rrezikim të personave në mbrojtje ndërkombëtare” dhe “sulm ndaj personit zyrtar”.
Lista Serbe e ka konsideruar vendimin për paraburgim si të paligjshëm dhe dy personat si të pafajshëm.
Peach: Zhvillimet e fundit e kanë dëmtuar imazhin ndërkombëtar të Kosovës
I dërguari britanik për Ballkanin Perëndimor, Stuart Peach, ka thënë se e ka vizituar këto ditë Kosovën, “në kohë serioze”.
Ai ka thënë se në takim me kryeministrin e Kosovës, Albin Kurti e ka dhënë një mesazh të qartë.
“Vendimi i Qeverisë së Kosovës për t’i vendosur me forcë kryetarët e komunave në ndërtesa komunale, ka qenë i pamenduar mirë dhe ka pasoja të dëmshme”.
Sipas tij, ekziston nevoja që të gjitha palët t’i ulin tensionet.
“I kam përcjell zhvillimet nga afër, dhe kam biseduar me homologët në Uashington, Bruksel dhe më tej. Këto biseda ma kanë bërë të qartë se zhvillimet e fundit e kanë dëmtuar imazhin ndërkombëtar të Kosovës dhe reputacionin e saj me aleatët”.
Ai ka thënë se Britania e ka mbështetur dhe do ta mbështesë Kosovën, por veprimet e njëanshme do ta bëjnë më të vështirë diçka të tillë.
Çka humbi Kosova që u pezullua nga “Defender Europe ‘23”?
Gati dy vjet. Kjo është periudha kohore që Ministria e Mbrojtjes e Kosovës dhe Forca e Sigurisë së Kosovës shpenzuan për t’u bërë gati për stërvitjen më të madhe të aleatëve të NATO-s në Ballkan, e njohur si “Defender Europe ‘23”.
Ani pse Kosova ishte një nga vendet nikoqire të kësaj stërvitjeje, ajo nuk mundi ta çonte deri në fund aktivitetin, pasi, më 30 maj, ambasadori amerikan në Prishtinë, Jeffrey Hovenier, tha se “për Kosovën, ato stërvitje kanë marrë fund”.
Ky është ndëshkimi i parë që Shtetet e Bashkuara të Amerikës ndërmorën kundër Kosovës për, siç u tha, injorimin e këshillave të tyre për të shmangur rritjen e tensioneve në zonën veriore me shumicë serbe.
Lexojeni materialin e plotë në linkun më poshtë:
Kolona e KFOR-it në veri
Të mërkurën, në veri të Kosovës është parë një kolonë me automjete të KFOR-it në drejtim të Zubin Potokut dhe Mitrovicës. Shefi i NATO-s, Jens Stolteberg, ka njoftuar se do të angazhohen edhe 700 trupa shtesë për të garantuar sigurinë në Kosovë, pas tensioneve në veri. Në Zveçan, Leposaviq dhe Zubin Potok, serbët lokalë janë duke protestuar kundër hyrjes së kryetarëve të rinj shqiptarë në ndërtesat komunale.
