Vuçiq: Kosova t’i tërheqë “kryetarët e supozuar”
Presidenti i Serbisë, Aleksandar Vuçiq, u bëri thirrje autoriteteve të Kosovës që t’i tërheqin, siç i quajti ai, "kryetarët e supozuar" nga komunat me shumicë serbe në veri, për t’i ulur tensionet që kanë shkaktuar dhunë.
Duke folur pas mbërritjes në një samit të Komunitetit Politik Evropian në Moldavi, Vuçiq tha se një hap i tillë do të ishte "lëvizja më e fuqishme" për zgjidhjen e krizës.
Në një postim në llogarinë e tij në Instagram, Vuçiq tha se nuk pret takime të lehta me udhëheqësit evropianë në Moldavi.
“Është e rëndësishme që ne të përpiqemi të ruajmë paqen dhe stabilitetin”, tha mes tjerash presidenti serb.
Pamje nga Zubin Potoku
Një numër i vogël qytetarësh serbë janë mbledhur në mëngjesin e së enjtes së 1 qershorit në qytezën e Zubin Potokut, për të protestuar kundër kryetarit të ri shqiptar, për të katërtën ditë me radhë.
Osmani: Vuçiq duhet ta ndalojë mbështetjen për bandat kriminale
Presidentja e Kosovës, Vjosa Osmani, tha se presidenti i Serbisë, Aleksandar Vuçiq, duhet ta ndalojë mbështetjen për "bandat kriminale" nëse vërtet do paqe.
"Sfida vjen nga Serbia, një vend që ende duhet ta pranojë të kaluarën e tij", tha Osmani për agjencinë e lajmeve Reuters.
Ajo po merr pjesë në një takim të Komunitetit Politik Evropian, i cili po mbahet në Kishinjev të Moldavisë.
"Situata është e tensionuar, por ne duhet të sigurohemi që e rivendosim sundimin e ligjit në Kosovë, dhe të kuptojmë se kërcënimi vjen nga mohimi që i bën Serbia ekzistencës së Kosovës si shtet sovran", tha Osmani.
Autoritetet e Kosovës kanë fajësuar “bandat kriminale serbe”, të dirigjuara nga Beogradi, për tensionet në veriun e vendit, të banuar me shumicë serbe.
Vuçiq e ka hedhur fajin te kryeministri i Kosovës, Albin Kurti.
Policia e Kosovës: Të shpërfillen thirrjet për protestë
Policia e Kosovës u bëri thirrje qytetarëve që t’i shpërfillin thirrjet për pjesëmarrje në një protestë sot në jug të Mitrovicës.
Policia tha se është në dijeni se “nëpër media të ndryshme sociale, nga persona dhe profile të ndryshme, janë duke qarkulluar postime me thirrje ndaj qytetarëve shqiptarë, për pjesëmarrje në gjoja protestë masovike, sot në ora 12:00, në jug të Mitrovicës dhe me synimin kinse për marshim në veri të vendit”.
Në komunikatën dërguar mediave, policia tha se është vërtetuar se shumë nga këto profile janë të dyshimta dhe se postimet mund të jenë qëllimkëqija.
“Thirrjet për protestë në jug të Mitrovicës dhe me synim marshimin drejt veriut të vendit, janë të panevojshme dhe nuk i ndihmojnë Republikës së Kosovës”, tha edhe ministri i Brendshëm i Kosovës, Xhelal Sveçla.