Franca dhe Gjermania kërkojnë zgjedhje të reja në veri
Presidenti i Francës, Emmanuel Macron, tha se Franca dhe Gjermania u kanë kërkuar udhëheqësve të Kosovës dhe serbëve që të organizojnë zgjedhje të reja në katër komunat veriore Zveçan, Leposaviq, Zubin Potok dhe Mitrovicë e Veriut.
Macron tha se zgjedhjet duhet të zhvillohen në këto komuna të cilat siç tha si janë prekur nga trazirat ditëve të fundit.
“Franca dhe Gjermania u kërkuan udhëheqësve të Kosovës dhe Serbisë të organizojnë zgjedhje të reja në rajonet e prekura nga trazirat sa më shpejt që të jetë e mundur”, tha Macron, i cili shtoi se u kërkua që të qartësohen edhe rregullat për zgedhje.
Ai tha gjatë javëve të ardhshme do të ketë “vendim të qartë” për situatën në veri të Kosovës dhe se për këtë gjë u pajtuan gjatë takimeve me kancelarin gjerman, Olaf Scholz, dhe liderët lokalë – presidenten e Kosovës, Vjosa Osmanin, dhe presidentin e Serbisë, Aleksandar Vuçiq.
Macron paralajmëron “vendim të qartë” për situatën në veri
Presidenti i Francës, Emmanuel Macron, ka thënë se gjatë javëve të ardhshme do të ketë “vendim të qartë” për situatën në veri të Kosovës.
Macron tha se për një gjë të tillë u pajtuan gjatë takimeve me kancelarin gjerman, Olaf Scholz, dhe liderët lokalë – presidenten e Kosovës, Vjosa Osmani dhe presidentin e Serbisë, Aleksandar Vuçiq.
Presidenti francez i bëri këto komente në një samit evropian që po zhvillohet në Kishinjev të Moldavisë.
Osmani dhe Vuçiqi kanë zhvilluar takime të ndara me udhëheqësit evropianë, në margjinat e samitit të Komunitetit Politik Evropian në kryeqytetin moldav
Më herët, presidentja e Kosovës, Vjosa Osmani, tha se ka diskutuar për situatën aktuale në Kosovë me presidentin francez Emmanuel Macron, kancelarin gjerman Olaf Scholz si dhe si dhe përfaqësuesin e Lartë të BE-së, Josep Borrell. Takimi u zhvillua në margjinat e një samiti evropian që po mbahet në Kishinjev të Moldavisë.
Presidentët e Kosovës dhe Serbisë këmbëngulën të enjten se duan të zbutin një krizë të dhunshme në veri të Kosovës, por treguan pak shenja të tërheqjes nga pozicionet e tyre kundërshtare.
Komandanti i KFOR-it viziton ushtarët italianë që u lënduan në Zveçan
Komandanti i misionit të KFOR-it në Kosovë, gjeneralmajor Angelo Michele Ristuccia, përgëzoi ushtarët italianë që u lënduan në përleshjet e 29 majit në Zveçan për ndërhyrjen e tyre në parandalimin e përshkallëzimit të situatës.
Gjatë vizitës që u bëri kontingjentit të ushtarëve të lënduar italian në kampin Villaggio Italia në Pejë, komandanti i KFOR-it, tha se ata parandaluan përplasjet që mund të çonin në viktima civile.
“Jini krenarë për atë që keni bërë, keni vepruar në përputhje të plotë me Rezolutën 1244 të Këshillit të Sigurimit të OKB-së të vitit 1999, duke u ndërhyrë mes dy palëve të kundërta dhe duke parandaluar një përplasje që sigurisht do të kishte çuar në një numër të madh të viktimave civile”, citohet të ketë thënë Ristuccia.
Ushtarët e lënduar italian do të kthehen në Itali për rikuperim ndërkohë që shumica e ushtarëve hungarezë të plagosur tashmë janë transportuar në shtëpi dhe janë transferuar në spitale. Në përleshje u lënduan 30 ushtarë të KFOR-it, tre prej tyre nga armë zjarri.
Pamjet nga përleshja e 29 majit:
Qeveria e Kosovës fton qytetarët të shmangin udhëtimet nëpër Serbi
Ministria e Punëve të Jashtme dhe Diasporës e Kosovës (MPJD), u ka bërë thirrje qytetarëve të Kosovës që të shmangin kalimet nëpër territorin e Serbisë.
“MPJD, gjatë ditës ka pranuar raportime për arrestime të qytetarëve të Republikës së Kosovës nga autoritetet serbe përgjatë kalimit të tyre nëpër Serbi, dhe po merret nga afër me rastet nëpërmjet Zyrës Ndërlidhëse në Beograd”, thuhet në njoftimin e Ministrisë së Punëve të Jashtme dhe Diasporës.
MPJD ka ftuar qytetarët që të shfrytëzojnë rrugë alternative të udhëtimit.