Përshëndetje të nderuar lexues,
Në këtë blog mund të ndiqni në kohë reale të gjitha zhvillimet lidhur me situatën në veri, pas bllokimit të rrugëve që çojnë në dy pikëkalimet kufitare – Jarinjë dhe Bërnjak – që lidhin Kosovën dhe Serbinë.
Bllokadat erdhën në kundërpërgjigje të dy vendimeve të Qeverisë së Kosovës lidhur me targat dhe dokumentet serbe.
Mëngjesin e 1 gushtit, sipas Policisë së Kosovës, situata në veri është e qetë dhe e pandryshuar.
Kamionët dhe mjetet e tjera të vendosura nga serbët lokalë po vazhdojnë të jenë në rrugët në afërsi të Jarinjës dhe Bërnjakut.
Pse po protestojnë serbët?
Serbët lokalë po kundërshtojnë dy vendimet e 29 qershorit të Qeverisë së Kosovës lidhur me targat dhe dokumentet serbe.
Qeveria ka thënë se do të pajisë me dokumente të hyrje-daljeve të gjithë shtetasit e Serbisë, me të hyrë në territorin e Kosovës.
Praktikë të njëjtë Serbia aplikon për qytetarët e Kosovës për vite me radhë.
Ndërkaq, vendimi i dytë ka të bëjë me riregjistrimin e makinave që kanë targa me akronime të qyteteve të Kosovës. Këto targa lëshohen nga Serbia dhe Kosova i konsideron ilegale.
Vlerësohet se në veriun e Kosovës, të banuar me shumicë serbe, qarkullojnë 10.000 makina me targa sikurse KM (Mitrovica e Kosovës), PZ (Prizren), UR (Ferizaj), e të tjera.
Por, pas tensionimit të situatës, ambasadori amerikan në Prishtinë, Jeffrey Hovenier, u takua me krerët institucionalë të Kosovës, duke iu kërkuar që të shtyjnë për një muaj zbatimin e këtyre vendimeve.
Qeveria u pajtua se do të shtyjë zbatimin deri në shtator, por shtyrja do të aplikohet nga momenti kur të hiqen barrikadat.
Mitrovica e Veriut zgjohet me mesazhe për Asociacionin
Në Mitrovicë të Veriut, komunë e banuar me shumicë serbe, në mëngjesin e 1 gushtit janë parë mesazhe lidhur me Asociacionin e komunave me shumicë serbe.
“Mirë se vini në Asociacionin e komunave me shumicë serbe”, shkruhet në pankartat dhe banerët e vendosur në qytet, teksa situata në këtë komunë raportohet të jetë e qetë.
Drejtori i Zyrës për Kosovën në Qeverinë serbe, Petar Petkoviq, më 30 korrik paralajmëroi se serbët në Kosovë do të nisin formimin e Asociacionit, nëse Prishtina nuk tërhiqet nga vendimet për targat dhe dokumentet identifikuese.
Kosova dhe Serbia kanë arritur marrëveshje për krijimin e Asociacionit më 2013 dhe 2015, nën ndërmjetësimin e Bashkimit Evropian, por marrëveshja ende nuk është zbatuar.
Gjykata Kushtetuese më 2015 tha se 23 pikat e marrëveshjes nuk janë në harmoni me Kushtetutën, por ato mund të harmonizohen përmes akteve ligjore nga Qeveria e Kosovës.
Serbia insiston në formimin e Asociacionit, por kryeministri i Kosovës, Albin Kurti, është shprehur kundër një Asociacioni njëetnik.
