Ish-presidenti i Kosovës, Hashim Thaçi, gjatë paraqitjes para Dhomave të Specializuara të Kosovës në Hagë më 9 nëntor 2020.

Deklarim pafajësie, akuza për ndërhyrje e përgjime: Çka ndodhi në nisje të gjykimit për pengim të drejtësisë

27 shkurt 2026

Mimoza Sadiku

Në Gjykatën Speciale janë mbajtur deklaratat hyrëse në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit.
Të pesë të akuzuarit në rastin për pengim të drejtësisë gjatë seancës u deklaruan të pafajshëm. Prokurori publikoi disa përgjime, për të mbështetur pretendimet e saj se Thaçi ka bërë përpjekje për të ndikuar mbi dëshmitarë.
Aktakuza pretendon se për disa muaj gjatë vitit 2023 ata kanë ndikuar në çështjen gjyqësore ndaj Thaçit, dhe tre ish-eprorëve të tjerë të Ushtrisë Çlirimtare të Kosovës për krime lufte dhe krime kundër njerëzimit.
Pas deklaratave hyrëse, Prokuroria ftoi dëshmitarin e parë, të mbrojtur, i cili do të vazhdojë dëshminë javën e ardhshme.

11:03

ZPS nis të lexojë pikat e akuzave për Thaçin

Prokurori i specializuar ka nisur të lexojë pikat e akuzës që rëndojnë ndaj Thaçit. Ai akuzohet për tri vepra penale kundër rendit publik dhe tetë akuza për vepra penale kundër administrimit të drejtësisë dhe administratës publike.

Prokurori tha se Thaçi mban përgjegjësi për tentim të pengimit të personave zyrtarë në kryerjen e detyrave zyrtare, shkelje të fshehtësisë së procedurës dhe mosbindje ndaj gjykatës.

Thaçi është deklaruar i pafajshëm.

11:08

ZPS po lexon edhe pikat e aktakuzës për Smakajn dhe të akuzuarit e tjerë

Gjatë seancës, Smakaj, tha Prokuroria, tha se mban përgjegjësi për veprën penale të tentimit të personave zyrtarë në kryerjen e detyrave zyrtare dhe mosbindje ndaj gjykatës. Për të njëjtat akuza akuzohen edhe Kilaj, Fazliu, ndërkaq Kuçi akuzohet për dy pika të veprës penale për mosbindje ndaj gjykatës.

Të gjithë të akuzuarit janë në gjykatore.

11:14

Të akuzuarit deklarohen për aktakuzën

Tani gjykatësi po i pyet me radhë të akuzuarit - që më herët janë deklaruar të pafajshëm - të tregojnë nëse e kuptojnë aktakuzën dhe nëse janë fajtorë ose jo.

Ata u deklaruan sërish të pafajshëm.

Më pas gjykatësi i informoi ata për të drejtat e tyre para gjykatës, që përfshin të drejtën e tyre për t'u mos deklaruar, të mos detyrohen të pranojnë fajësinë apo të japin dëshmi, të mos inkriminojnë veten apo anëtarët e familjes, të kenë avokat, të gjykohen në një kohë të arsyeshme etj.

11:21

Gjykatësi: Synohet që argumentet mbyllëse të ZPS-së të zgjasin deri më 13 mars

Para se të japë fjalën për palët për deklaratat hyrëse gjykatësi i vetëm i rastit, Christopher Gosnell, tha se dëshmitarët e ZPS-së duhet të përfundojnë dëshmitë e tyre deri më 6 mars dhe me argumentet mbyllëse më 13 mars.

Ai tha se 13 marsi është datë e synuar, pasi data përfundimtare për mbylljen e ZPS do të përcaktohet kur të bëhen parashtrimet e palëve.

Ai tha se mëton që seancat të jenë të hapura, vetëm kur kërkohet e kundërta apo kur ka informacione konfidenciale.

Shfaq më shumë