Rreth dy milionë njerëz kanë ikur nga Ukraina në Poloni
Mbi 1.95 milion njerëz kanë ikur prej Ukrainës në Poloni prej shpërthimit të luftës, ka thënë Agjencia kufitare e Polonisë të enjten.
Më shumë se gjysmë milioni njerëz tashmë larguar nga Polonia drejt destinacioneve tjera, sipas hulumtuesit për migrim në Universitetin e Varshavës, Maciej Duszczyk.
Vetëm të mërkurën, 60,000 persona kanë kaluar kufirin, ka thënë Garda Kufitare.
Shumica e refugjatëve kanë shkuar në qytete të mëdha, përfshirë Varshavën, Krakovin dhe Vrocllavin, kapacitetet e të cilave janë të mbushura.
Ukraina shpreson se do të hapen korridoret humanitare nga Mariupoli
Zyrtarët ukrainas kanë thënë se shpresojnë të hapin nëntë “korridore humanitare” nga disa qytete të shtetit, përfshirë ato nga qyteti i rrethuar i Mariupolit në juglindje.
Zëvendëskryeministrja ukrainase, Iryna Vereshchuk, ka thënë se Qeveria është duke shpresuar që të hapë rrugët gjatë së enjtes.
Ajo i ka bërë këto deklarata një ditë pasi presidenti ukrainas, Volodymyr Zelensky, ka thënë se forcat ruse kanë shënjestruar me qëllim një teatër në Mariupol, në të cilin kanë qenë duke u strehuar qindra persona.
Teatri historik i Mariupolit që u godit nga sulmet ajrore ruse
Bombardohet një qendër edukative në Merefa
Raketat ruse kanë bombarduar një qendër edukative në orët e para të mëngjesit të së enjtes, ka thënë Shërbimi Shtetëror për Emergjenca në Ukrainë.
Autoritetet kanë thënë se ndërtesa në Merefa, qytezë në rajonin Harkiv, është shkatërruar pjesërisht. Shërbimet e zjarrfikësve janë duke tentuar të shuajnë zjarrin.
Mediat lokale kanë raportuar se një shkollë dhe qendër komuniteti janë goditur.
Ende nuk ka raportime për viktima.
Hungaria pret “valë” të refugjatëve javën e ardhshme
Kryeministri hungarez, Viktor Orban, ka thënë se ai pret që të shohë “valën më të madhe të refugjatëve” nga Ukraina, javën që vjen.
Duke folur gjatë një vizite në pikën kufitare të Hungarisë me Ukrainën dhe Rumaninë, Orban ka thënë se rojet kufitare do të pozicionohen aty javën e ardhshme për të menaxhuar fluksin në rritje të refugjatëve.
Deri më 14 mars, 263,888 ukrainas kanë kaluar kufirin në Hungari, sipas agjencive të Kombeve të Bashkuara.
Të mërkurën, një këshilltar i Orbanit ka thënë për mediat hungareze se zyrtarët presin që të pranojnë 900,000 refugjatë deri në fund të luftës.
Megjithatë, numri i refugjatëve që po arrijnë në Hungari ka rënë në krahasim me javët e kaluara.