Demokracia në Veprim shpall Vetëvendosjen fituese të zgjedhjeve
Koalicioni i organizatave për vëzhgimin e zgjedhjeve në Kosovë, Demokracia në Veprim (DnV), doli me rezultate paraprake të zgjedhjeve të 14 shkurtit, sipas të cilave, Lëvizja Vetëvendosje ka fituar 48.95% të votave.
Po sipas tyre, Partia Demokratike e Kosovës ka fituar 16.93%, Lidhja Demokratike e Kosovës 13.34%, Aleanca për Ardhmërinë e Kosovës 7.45%, Lista Serbe 4.64%, Nisma Socialdemokrate 2.5%. Kjo e fundit, me këtë rezultat, nuk e kalon pragun zgjedhor.
Ismet Kryeziu, nga Demokracia në Veprim, tha në një konferencë për media se në këto përqindje të prezantuara nuk janë përfshirë votat me kusht e as nga ato nga diaspora.
Komisioni Qendror i Zgjedhjeve po publikon në ueb-faqen e tij rezultatet preliminare të zgjedhjeve të parakohshme, që u mbajtën të dielën.
Hoti: E marr përgjegjësinë e plotë për rezultatin
Kandidati për kryeministër i Lidhjes Demokratike të Kosovës, Avdullah Hoti, tha se merr “përgjegjësinë e plotë” për rezultatin e partisë së tij në zgjedhjet e 14 shkurtit në Kosovë.
Në një konferencë për media në Prishtinë, Hoti tha se “rezultatet janë tjera me ato që i kemi pritur”.
“Në ditët në vijim do të diskutoj gjerësisht me organet e LDK-së për këtë përgjegjësi timen në këto zgjedhje”, tha Hoti.
Në bazë të rezultateve preliminare të Komisionit Qendror të Zgjedhjeve, LDK-ja ka dalë e treta, me rreth 13 për qind të votave.
Po sipas këtyre rezultateve, Lëvizja Vetëvendosje është e para me rreth 48 për qind dhe Partia Demokratike e Kosovës e dyta me rreth 17 për qind të votave.
Mustafa: LDK do ta respektojë rezultatin e zgjedhjeve
Kryetari i Lidhjes Demokratike të Kosovës, Isa Mustafa, tha se partia e tij do ta respektojë rezultatin e zgjedhjeve të 14 shkurtit, cilido që të jetë ai.
Në një postim në Facebook, Mustafa tha se kandidati për kryeministër i LDK-së, Avdullah Hoti, ka bërë “një punë të shkëlqyeshme”, edhe gjatë kohës sa ka qenë kryeministër, edhe gjatë fushatës.
“Ne do t’i bëjmë ndryshimet e nevojshme dhe LDK-ja do të punojë shumë që të rikthehet dhe ta sendërtojë vizionin e saj rugovian për vendin”, shkroi Mustafa.
Në bazë të rezultateve preliminare të Komisionit Qendror të Zgjedhjeve, LDK-ja ka dalë e treta, me rreth 13 për qind të votave.
E para radhitet Lëvizja Vetëvendosje me rreth 48 për qind dhe e dyta Partia Demokratike e Kosovës me rreth 17 për qind.
Hoxhaj uron Vetëvendosjen: Nuk do të jemi pjesë e Qeverisë
Kandidati për kryeministër i Partisë Demokratike të Kosovës, Enver Hoxhaj, e uroi Lëvizjen Vetëvendosje për fitoren në zgjedhjet parlamentare të 14 shkurtit.
Hoxhaj tha se e fton Vetëvendosjen të punojë për të forcuar shtetin e Kosovës, por shtoi se nuk do të jetë pjesë e Qeverisë me të.
Në bazë të rezultateve preliminare të Komisionit Qendror të Zgjedhjeve, Vetëvendosje prin me vota: mbi 48 për qind.
Partia Demokratike e Kosovës, ndërkaq, është e dyta: mbi 17 për qind.