Shkeljet kryesore që u evidentuan deri më tani nga vëzhguesit e DnV-së
- Në 83 raste qytetarët kanë fotografuar votën
- Fotografimi i votës është evidentuar në 53 vendvotime
- Në 31 raste, qytetarët kanë publikuar fletëvotimin
- Bërja publike e fletëvotimit ka ndodhur në 28 vendvotime
- Në 96 raste është evidentuar qëndrimi i më shumë se një personi afër kutisë së votimit
- 7300 persona kanë pasur vështirësi për gjetjen e vendvotimeve
*Rrjeti i Organizatave Demokracia në Veprim ka publikuar edhe parregullsi të tjera gjatë ditës. Ky rrjet i OJQ-ve që përbëhet nga 40 sosh, ka rreth tre mijë vëzhgues në terren në të gjithë territorin e Kosovës.
Graçanicë, qytetarët presin ndryshime pozitive dhe qetësi
Qytetarët serbë të Graçanicës presin që pas zgjedhjeve të parakohshme parlamentare të Kosovës, të kenë jetesë më të mirë dhe perspektivë për të rinjtë. Ata presin edhe vendosje të marrëdhënieve të mira ndërmjet Kosovës dhe Serbisë, në mënyrë që populli te jetojë i qetë.
Ndalohen shtatë persona për fotografim të votës në Prizren
Policia e Kosovës ka konfirmuar për Radion Evropa e Lirë se deri në orën 17:30, janë shoqëruar në polici shtatë persona të cilët kanë fotografuar votën gjatë procesit të votimit.
Shefi i Zyrës për Informim në Policinë e Kosovës për rajonin e Prizrenit, Shaban Osmanollaj tha për Radion Evropa e Lirë se pesë nga shtatë personat e ndaluar iu është caktuar masa e ndalimit prej 48-orësh.
“Policia e Kosovës deri më tani ka iniciuar shtatë raste të ‘cenimit të fshehtësisë së votimit’, pra në këto raste është bërë fotografimi i votës. Pesë nga këta persona janë ndaluar në mbajtje me aktvendim të prokurorit për 48 orë, ndërsa dy persona janë liruar në procedurë të rregullt”, tha Osmanollaj.
Osmanollaj ka njoftuar se në këto raste janë konfiskuar edhe telefonat për hetime të mëtutjeshme.
Ndërkaq në fshatin Dujakë të Gjakovës, një person është arrestuar për “pengim të procesit të votimit”. Sipas policisë, ka pasur mosmarrëveshje ndërmjet një vëzhguesi dhe menaxherit të qendrës së votimit.
"Ju njoftojmë se policia në Gjakovë në ora 15:50, ka marr informacion për një mosmarrëveshje në qendrën e votimit në fshatin Dujakë. Menjëherë zyrtarët policor kanë dal në vendin e ngjarjes ku kanë kuptuar se ka ndodhur një mosmarrëveshje në mes dy personave saktësisht një vëzhgues dhe menaxheri i qendrës së votimit”, thuhet në përgjigjen e Policisë dërguar Radios Evrpa e Lirë, ku njoftohet se personi i dyshuar tani është në ndalim policor.
Mungesë e fletëvotimeve me kusht
Në disa vendvotime me kusht në Komunën e Prishtinës është raportuar për mungesë të fletëvotimeve me kusht.
Zëdhënësi i Komisionit Qendror të Zgjedhjeve, Valmir Elezi tha për Radion Evropa e Lirë se bëhet fjalë për mungesë vetëm të fletëvotimeve me kusht, e jo atyre të rregullta.
“Sipas informacioneve që i kemi pranuar nga Komisioni Komunal në Prishtinë, në qendrën e votimit që është vendosur në Fakultetin Filologjik, fletëvotimet janë shpenzuar, bëhet fjalë jo për fletëvotimet e vend votimeve të rregullta, por për fletëvotimet me kusht. Menjëherë, pas kësaj Komisioni Komunal i Zgjedhjeve ka marrë të gjitha masat dhe ka dërguar fletëvotimet nga rezervat në mënyrë që nëse ka votues me kusht që do të votojnë në këtë qendër atëherë të mund të përballojnë kërkesat”, tha Elezi.
Elezi gjithashtu përmendi se është raportuar që në shkollën “Dardania” në Prishtinë ka pasur mungesë të fletëvotimeve me kusht, me ç’rast materiali është duke u dërguar në këtë qendër të votimit.
Lexo edhe këtë: Kosnett: Kosova po zgjedh për një të ardhme prosperuese