Ndërlidhjet

Kosova miraton pakon e sanksioneve kundër Rusisë


Takim i Qeverisë së Kosovës. Fotografi nga arkivi.

Qeveria e Kosovës ka miratuar të premten një pako me sanksione kundër Rusisë, pas pushtimit të Ukrainës.

Kryeministri i Kosovës, Albin Kurti ka thënë se Kosova me këtë vendim u është bashkëngjitur Shteteve të Bashkuara dhe Bashkimit Evropian në kundërpërgjigjen ndaj sulmit rus në Ukrainë.

“Ushtria ruse është ajo e cila me këtë agresion e bëri Evropën të tronditet dhe arkitekturën e sigurisë ndërkombëtare të rimendohet”, ka thënë Kurti.

“Kjo Rusi që po shohim sot nuk është e re, por edhe një paralajmërim që ajo nuk synon të jetë e re”.

Ministrja për Punë të Jashtme dhe Diasporë në Kosovë, Donika Gërvalla, ka thënë se sulmi rus përbën “një ndër goditjet më të rrezikshme që i është bërë sigurisë evropiane dhe asaj ndërkombëtare në dekadën e fundit”.

Pamjet e luftës në Ukrainë kujtojnë ankthin e luftës në Kosovë
Ju lutem të prisni

No media source currently available

0:00 0:03:17 0:00

“Sanksionet përfshijnë ngrirje të aseteve të bankave, institucioneve financiare dhe individëve, ndalimi i tyre në tregje financiare dhe masa tjera kufizuese që shënjestrojnë ndërmarrjet e rëndësishme ruse, elitat dhe akterët politikë të përfshirë në marrjen e vendimit për invazionin rus në Ukrainë”, ka thënë Gërvalla.

Presidentja e Kosovës, Vjosa Osmani është takuar të premten me pjesëtarë të opozitës për të diskutuar situatën e sigurisë në këtë vend, pas zhvillimeve të fundit të lidhura me pushtimin rus në Ukrainë.

Sipas njoftimit të Presidencës, Osmani është takuar me kryetarin e Lidhjes Demokratike të Kosovës, Lumir Abdixhiku, nënkryetaren e Partisë Demokratike të Kosovës, Vlora Çitaku dhe nënkryetarin e Aleancës për Ardhmërinë e Kosovës, Muharrem Nitaj.

Mes tjerash është thënë se palët kanë diskutuar edhe për masat që kanë marrë institucionet e Kosovës për t’u koordinuar me partnerët ndërkombëtarë.

Sulmi i Moskës ndaj Ukrainës ka nisur në orët e para të 24 shkurtit.

Raketat janë nisur në aeroporte dhe infrastrukturë ushtarake në rreth 25 qytete.

Presidenti rus, Vladimir Putin ka urdhëruar “operacion special” për të çmilitarizuar Ukrainën.

Veprimi i Kremlinit ka nxitur zemërim dhe është dënuar në gjithë botën.

Shtetet e Bashkuara dhe aleatët janë përgjigjur me sanksione të ashpra kundër Moskës.

Për t’u njoftuar rreth zhvillimeve më të fundit lidhur me Ukrainën, ndiqeni blogun tonë.

XS
SM
MD
LG