Ndërlidhjet

Votohet Qeveria Hoti, Kurti e quan të paligjshme


Kryeministri i ri i Kosovës, Avdullah Hoti.

Përmbledhja

  • Deputetët e Kuvendit të Kosovës, me 61 vota për, kanë votuar qeverinë e re të udhëhequr nga Avdullah Hoti.
  • Presidenti Thaçi kishte mandatuar Avdullah Hotin nga Lidhja Demokratike e Kosovës për kryeministër të Kosovës, pasi përmes mocionit të mosbesimit ishte rrëzuar Qeveria Kurti.
  • Lëvizja Vetëvendosje, fituese e zgjedhjeve të 6 tetorit, kishte dërguar në Gjykatën Kushtetuese dekretin e presidentit.
  • Më 28 maj, Gjykata Kushtetuese i dha të drejtë presidentit Thaçi për mandatarin e qeverisë së re.
  • Lëvizja Vetëvendosje ka kundërshtuar formimin e qeverisë së re dhe ka kërkuar zgjedhje të reja.
  • Shkarkimi i ministrit të Brendshëm Agim Veliu dhe heqja e tarifës 100 % ndaj Serbisë pa reciprocitet, u bënë shkaktare të prishjes së koalicionit LVV-LDK pas më pak se 50 ditësh.
17:46 3.6.2020

OEAK i kërkon qeverisë së re të fokusohet në rimëkëmbjen ekonomike

Oda Ekonomike Amerikane (OEAK) thotë se Qeveria e sapozgjedhur e Kosovës, që udhëhiqet nga kryeministri Avdullah Hoti, duhet të ketë prioritet përballjen me pasojat e pandemisë së koronavirusit.

OEAK thotë se qeveria duhet të miratojë një pako gjithëpërfshirëse për rimëkëmbjen ekonomike pas pandemisë.

“Aprovimi i një pakoje gjithëpërfshirëse të rimëkëmbjes ekonomike e cila duhet të jetë produkt i një procesi të dialogimit me të gjithë hisedarët e rëndësishëm në Kosovë duhet të jetë i një rëndësie të jashtëzakonshme”.

“Pakoja duhet të ofrojë mbulesë proporcionale të dëmeve që janë shkaktuar në të gjithë sektorët pas shpërthimit të pandemisë COVID-19, por në të njëjtën kohë të shërbejë edhe si kornizë për ristrukturimin e gjithëmbarshëm të ekonomisë së vendit”, thuhet në njoftimin e Odës Ekonomike Amerikane.

Kryeministri i ri i Kosovës, Avdullah Hoti gjatë adresimit të tij në seancën plenare ku u votua për kabinetin e tij qeverisës, tha se rimëkëmbja ekonomike pas pandemisë është prioriteti kryesor i ekzekutivit të tij.

17:28 3.6.2020

Votimi i Qeverisë Hoti

Në videon e mëposhtme mund të mësoni se si rrodhi seanca plenare, ku u zgjodh Qeveria e re e Kosovës, në krye me Avdullah Hotin nga Lidhja Demokratike e Kosovës.

Kuvendi votoi qeverinë e re
Ju lutem të prisni
Embed

No media source currently available

0:00 0:02:03 0:00

17:05 3.6.2020

Raportuesja për Kosovën në PE dënon “presionin ndaj deputetëve të Kosovës”

Raportuesja për Kosovën në Parlamentin Evropian, Viola von Cramon-Taubadel, ka mirëpritur votimin e Qeverisë së re të Kosovës, të udhëhequr nga Avdullah Hoti.

Në një deklaratë për media, ajo ka thënë se shpreson që qeveria e re të mund të zbatojë reforma të reja dhe të “punojë për një Kosovë më të mirë”.

Megjithatë, Cramon-Taubadel ka thënë se deputetët e Kuvendit të Kosovës ishin “nën presion të madh” nga lidershipi i Lidhjes Demokratike të Kosovës dhe presidenti Hashim Thaçi për të votuar pro qeverisë së re.

“Disa burime kanë thënë se presidenti (v.j. Hashim Thaçi) ka vizituar personalisht këta deputetë të kuvendit, pa votat e të cilëve nuk do të mund të zgjidhej qeveria. Nëse këto pretendime janë të vërteta, ky është një sinjal i keq që tregon se roli i parlamentit është minuar, e që një gjë e tillë është e garantuar edhe me Kushtetutë. Si një pjesëtare e parlamentit, për mua është e papranueshme që anëtarëve të parlamentit, të zgjedhur në mënyrë demokratike, t’iu bëhet presion”, tha ajo, duke shtuar se është bazë e demokracisë që deputetët të votojnë në bazë të vullnetit dhe ndërgjegjes së tyre.

Gjatë seancës së Kuvendit të Kosovës, ku u votua për qeverinë e re, ishte deputeti i Nismës Socialdemokrate, Haxhi Shala që deklaroi se ai kishte ndryshuar mendimin për ta votuar qeverinë, pasi një natë më parë ishte takuar me presidentin e Kosovës, Hashim Thaçin dhe kryetarin e Aleancës për Ardhmërinë e Kosovës, Ramush Haradinaj.

Kuvendi i Kosovës me 61 vota për ka votuar Qeverinë Hoti dhe vota e deputetit Shala po shihet si vendimtare për formimin e ekzekutivit të ri.

16:42 3.6.2020

Presidenti Thaçi fton Kurtin që t’ia dorëzojë detyrën Hotit

Pas votimit të qeverisë së re, presidenti i Kosovës, Hashim Thaçi, ka kërkuar nga kryetari i Vetëvendosjes, Albin Kurti që të bëjë dorëzimin e detyrës së kryeministrit te Avdullah Hoti.

Presidenti Thaçi ka thënë se Kurti duhet larguar, nga siç ka thënë ai, “uzurpimi” i zyrave të qeverisë.

Presidenti Thaçi gjatë një konference për media. Foto nga arkivi.
Presidenti Thaçi gjatë një konference për media. Foto nga arkivi.


“Gjithashtu kërkohet që Kurti të heqë dorë nga barrikadimi në zyrën e uzurpuar. Barrikadimi i tij që nuk i bën nderë as atij e as partisë së tij, as shtetit të Kosovës, as demokracisë në Kosovë. Pas shkarkimit, ai tanimë po bëhet edhe më qesharak”, ka deklaruar në një konferencë për media presidenti Thaçi.

Me votimin e qeverisë së re, presidenti Thaçi ka thënë se përfaqësuesit legjitim të qytetarëve në Kuvendin e Kosovës i dhanë përgjigjen e merituar, siç u shpreh ai, “ndërmarrjes kriminale të Vetëvendosjes”.

Duke folur për qeverinë e re, presidenti Thaçi ka thënë se mirëpret zotimin e kryeministrit Avdullah Hoti për ndërtimin e marrëdhënieve speciale me Shtetet e Bashkuara të Amerikës.

Konferenca e presidentit Thaçi është penguar nga brohoritjet e një grupi qytetarësh që ishin tubuar në sheshin para objektit të Kuvendit të Kosovës, ku gjendet edhe Presidenca.

Qeveria e drejtuar nga Avdullah Hoti u votua me 61 vota pro në Kuvendin e Kosovës.

Trego më shumë

XS
SM
MD
LG