Seanca e opozitës shtyhet për të enjten
Kryetari i Kuvendit të Kosovës, Kadri Veseli me kërkesë të nënkryetarit të Kuvendit nga Lidhja Demokratike e Kosovës, Kujtim Shala, e ka shtyrë seancën e jashtëzakonshme të opozitës për të enjten në ora 10:00.
Shtyrja e seancës u bë për shkak të mungesës së numrit të deputetët në sallë, për të formuar numrin e mjaftueshëm për kuorum.
Opozita nuk ka kuorum për të nisur seancën
Seanca e jashtëzakonshme e Kuvendit të Kosovës, e thirrur nga partitë opozitare, nuk ka mundur të nisë, për shkak të mungesës së kuorumit.
Kryetari i Kuvendit, Kadri Veseli shpalli 30 minuta pauzë.
Të pranishëm në sallë ishin edhe katër deputetë të partisë në pushtet, Nismës Socialdemokrate bashkë me kryetarin e kësaj partie, Fatmir Limaj, njëherësh zëvendëskryeministër i Kosovës.
Opozita po kërkon që të miratojë një rezolutë për të ndaluar, siç ka ka thënë, presidentin Hashim Thaçi, që në dialogun me Serbinë në Bruksel, të flasë për “shkëmbimin e territoreve” apo “korrigjimin e kufijve”.
Kuvendi nuk ka kuorum për votimin e ekipit negociator të Qeverisë
Kryetari i Kuvendit të Kosovës, Kadri Veseli tha se nuk ka kuorum për të votuar për ekipin negociator të propozuar nga Qeveria e Kosovës për dialogun me Serbinë.
“Për këtë aryse ne duhet të mendojmë që vazhdimi i seancës të bëhet kur të kemi kuorum”, tha Veseli.
Veseli po ashtu tha se seanca e thirrur nga opozita, do të mbahet në orën 19:30.
Seanca e opozitës pritet të nisë në orën 19:30
Zyrtarë nga Kuvendi i Kosovës i kanë thënë Radios Evropa e Lirë se seanca e thirrur nga opozita është planifikuar të nisë në orën 19:30.
Opozita ka thirrur seancë të jashtëzakonshme me qëllim të miratimit të një rezolute e cila do të ndalonte presidentin Hashim Thaçi, që në dialogun me Serbinë, të mos flasë për ndryshimin e kufijve të Kosovës.
Facebook Forum