Ndërlidhjet

Uashington

Në pritje të rezultateve nga shtetet kyçe

  • Në Shtetet e Bashkuara të Amerikës, më 3 nëntor, janë mbajtur zgjedhjet presidenciale.
  • Sistemi politik amerikan dominohet nga dy parti, andaj presidenti gjithmonë i përket njërës prej tyre.
  • Republikanët janë parti politike konservatore dhe kandidati i tyre në zgjedhjet e këtij viti është presidenti Donald Trump, i cili shpreson t’i sigurojë edhe katër vjet në pushtet.
  • Demokratët janë parti politike liberale dhe kandidat i tyre është Joe Biden, një politikan me përvojë, më i njohur për shërbimin e tij si zëvendëspresident në administratën e Barack Obamës.
  • Të dy kandidatët, në të 70-tat e tyre, garojnë për të fituar votat e Kolegjit Zgjedhor.
  • Secili shtet ka një numër të caktuar të votave të Kolegjit Zgjedhor, bazuar në popullsinë e tij.
  • Kolegji Zgjedhor ka gjithsej 538 vota dhe fitues i zgjedhjeve është kandidati që siguron 270 ose më shumë prej tyre. Fituesin nuk e përcakton vota e popullit.
  • Zgjedhjet në SHBA mbahen çdo katër vjet në të martën e parë të nëntorit dhe të drejtë vote ka secili shtetas amerikan mbi 18 vjeç.
  • Rezultati mund të dihet në natën e zgjedhjeve, por mund të marrë edhe ditë ose javë.
  • Presidenti i ri betohet zyrtarisht më 20 janar në një ceremoni që njihet si inaugurim.
19:53 4.11.2020

Fushata e Trumpit do të kërkojë rinumërim në Uiskonsin

Fushata e presidentit Donald Trump tha se do të kërkojë rinumërim të votave në shtetin kyç të Uiskonsinit, ku rezultatet e hershme e nxjerrin kandidatin demokrat, Joe Biden, në epërsi.

“Ka pasur raporte për parregullsi në disa qarqe të Uiskonsinit, të cilat ngrenë dyshime serioze në lidhje me vlefshmërinë e rezultateve”, tha menaxheri i fushatës së Trumpit, Bill Stepien.

Në Uiskonsin, kandidatëve u lejohet të kërkojnë rinumërim nëse margjina fituese është një për qind ose më pak.

Sipas ligjit në Uiskonsin, rinumërimi duhet të përfundojë brenda 13 ditëve nga kërkesa.

Uiskonsini është një nga gjashtë shtetet, ku gara midis Trumpit dhe Bidenit është tejet e ngushtë dhe numërimi vazhdon.

19:23 4.11.2020

Informacionet e fundit nga Nevada

Sekretari i shtetit të Nevadës tha se ky shtet nuk do të japë më rezultate të zgjedhjeve, deri të enjten në mëngjes, raporton BBC.

Ai tha se vendimi u mor për të lehtësuar presionin mbi qarqet, të cilat kanë ende vota për të numëruar.

Në shtetin e Nevadës aktualisht kryeson kandidati demokrat, Joe Biden, me më pak se 8,000 vota epërsi kundrejt presidentit Donald Trump.

Në një lidhje telefonike me gazetarët të mërkurën, ndihmësi i Trumpit, Jason Miller, tha se Nevada është një shtet “i mbushur me korrupsion”, edhe pse nuk ofroi prova për këtë.

Nevada është njëri nga gjashtë shtetet kyçe, ku gara Trump-Biden është tejet e ngushtë dhe numërimi i votave vazhdon.

18:51 4.11.2020

Twitter fsheh postimin e Trumpit për “zhdukjen e avantazhit” të tij

Një ditë pas zgjedhjeve në SHBA, Twitter ka fshehur një postim të presidentit Donald Trump, në të cilin ai ka shkruar se avantazhi i tij në shtetet kyçe, të udhëhequra nga demokratët, “ka nisur të zhduket me magji”.

Twitter ka ndërmarrë veprim të ngjashëm edhe ndaj një postimi tjetër, në të cilin Trump ka thënë se kundërshtarët e tij “janë duke bërë përpjekje t’i vjedhin votat”.

Të dyja mesazhet janë tani të fshehura pas paralajmërimeve se këto pretendime janë të diskutueshme dhe mund të jenë çorientuese.

Fshehja e tyre po ashtu i kufizon mundësitë e përdoruesve për të pëlqyer postimet ose për t’u përgjigjur në to.

Facebook ka vendosur “kuti të kontrollit të fakteve” te mesazhet e njëjta të Trumpit në platformën e tij, duke thënë se rezultatet përfundimtare mund të marrin më shumë kohë se normalisht.

Facebook nuk i ka kufizuar pëlqimet apo komentet në mesazhet e Trumpit.

Presidenti amerikan, Donald Trump.
Presidenti amerikan, Donald Trump.

Twitter nuk ka reaguar ndaj ndonjë postimi të rivalit demokrat të Trumpit, Joe Biden, por ka fshehur një postim të kryetarit të Partisë Demokratike në Uiskonsin, Ben Wikler, i cili ka thënë se “Joe Biden sapo e ka fituar Uiskonsinin”.

Fushata e presidentit Trump tha se rrjetet sociale vazhdojnë fushatën e tyre “për të censuruar dhe heshtur presidentin”.

Rezultati i zgjedhjeve të 3 nëntorit në SHBA është i paqartë ende, pasi numërimi i votave në disa shtete kyçe vazhdon.

18:28 4.11.2020

Xhorxhia ka edhe rreth 200,000 vota për të numëruar

Sekretari i shtetit të Xhorxhias, Brad Raffensperger, tha se ky shtet ka edhe rreth 200,000 vota për të numëruar nga zgjedhjet presidenciale.

“Çdo fletëvotim i vlefshëm do të numërohet”, tha ai në një konferencë për media.

Xhorxhia, e cila ka 16 vota elektorale, është një nga shtetet kyçe, ku gara midis presidentit Donald Trump dhe rivalit të tij demokrat, Joe Biden, është e ngushtë.

Trego më shumë

XS
SM
MD
LG