Bosnje-Hercegovina dhe Kroacia janë përballur ditëve të fundit me vërshime, për shkak të reshjeve të mëdha të shiut.
Lumenjtë Una dhe Krushnica, kanë dalë prej shtretërve të tyre.
Në Bosnjë është shpallur gjendje e jashtëzakonshme, në komunat Novi Grad, Kostajnica, Bosanska Krupa dhe Bihaq.
Në Komunën e Novi Gradit nuk do të mbahet procesi mësimor, ashtu sikurse në Obrovac të Kroacisë.
Disa vende është raportuar të kenë mbetur pa energji elektrike.
Disa banorë edhe janë detyruar të largohen nga shtëpitë e tyre, por shkalla e dëmeve nuk dihet ende.
Mbi 200 ndërtesa banimi janë vërshuar në qytetin Bosanska Krupa, pas daljes së lumenjve nga shtretërit.
“Ende nuk kemi vlerësuar shkallën e dëmeve. Qasja në qytet nga disa rrugë lokale është bllokuar”, tha për Radion Evropa e Lirë, kryetari i këtij qyteti, Armin Halitoviq.
Në Bihaq situata është më e vështirë dhe zyrtarët lokalë atje kanë thënë se mbi 200 ndërtesa janë vërshuar.
Muhamed Pecenkoviq, nga Mbrojtja Civile e Kantonit, tha për Radion Evropa e Lirë se rruga kryesore që çon për në Bihaq, por edhe rrugë të tjera lokale janë mbyllur për shkak të vërshimeve.
Në Velika Kladua, gjashtë shtëpi janë vërshuar krejtësisht, ndërkaq 30 shtëpi të tjera rrezikojnë të vërshohen.
Në Kroaci, rreth 300 trupa ushtarake janë aktivizuar për t’iu ndihmuar njerëzve në nevojë, kanë thënë autoritetet.
Ekipet është thënë se u kanë dërguar ushqime banorëve të bllokuar në shtëpitë e tyre.
Kryeministri kroat, Andrej Plenoviq ka bërë të ditur se Qeveria do të ndajë fonde për t’iu ndihmuar personave të prekur nga vërshimet.