Chollet anulon vizitën në Kosovë
Këshilltari i lartë i Departamentit amerikan të Shtetit, Derek Chollet, anuloi vizitën në Kosovë, për “arsye familjare”, merr vesh Radio Evropa e Lirë.
Ka qenë e paraparë që Chollet dhe i dërguari amerikan për Ballkanin Perëndimor, Gabriel Escobar, të takojnë pasditen e sotme udhëheqësit e lartë të shtetit të Kosovës, ndërsa mëngjesin e së martës përfaqësues të partive politike.
Në një njoftim të Qeverisë së Kosovës u bë e ditur se kryeministri Albin Kurti do të presë pasdite në takim vetëm Escobarin.
Vizita vjen në kohën kur situata në veri të Kosovës - zonë e banuar me shumicë serbe - është e tensionuar.
Për më shumë, lexoni këtu.
Policia e Kosovës duke patrulluar në Mitrovicë të Veriut
Një fotograf i agjencisë Reuters sjell fotografi të pjesëtarëve të Policisë së Kosovës duke patrulluar në Mitrovicën e Veriut.
Rrugët në veri mbesin të bllokuara
Kamionë të mëdhenj dhe autobusë vazhdojnë t'i bllokojnë rrugët në veri të Kosovës, duke penguar qarkullimin drejt pikave kufitare me Serbinë, Jarinjë dhe Bërnjak. Disa grupe të qytetarëve serbë atje filluan ngritjen e barrikadave qysh më 10 dhjetor, kur autoritetet në Kosovë njoftuan për arrestimin e një ish-polici serb.
Ekipi i REL-it dokumentoi një kamion që, me sa duket, është donacion i Bashkimit Evropian dhe po përdoret nga disa qytetarë serbë për të bllokuar rrugët në veri të Kosovës.
