Luftime të ashpra janë raportuar midis luftëtarëve kurdë dhe militantëve të Shtetit Islamik (IS) në qytetin Kobani të Sirisë.
Raportet thonë se luftëtarët e IS-it kanë avancuar disa kilometra brenda qytetit kurd, pavarësisht sulmeve ajrore të udhëhequra nga Shtetet e Bashkuara.
Më herët, kryeministri turk, Ahmet Davutoglu, ka thënë se vendi i tij do të bëjë më të mirën e mundshme për të ndaluar IS-in nga uzurpimi i qytetit Kobani.
“Ne nuk do të donim që Kobani të bie. Do të bëjmë gjithçka të mundur për të parandaluar një gjë të tillë”, ka thënë Davutoglu.
Ai i ka bërë këto komente disa orë pasi Parlamenti turk ka miratuar një mocion, që i lejon qeverisë të kryejë operacione ushtarake brenda Irakut dhe Sirisë.
Ligjvënësit po ashtu i kanë dhënë qeverisë kompetenca për të lejuar forcat e koalicionit ndërkombëtar që të kryejnë operacione të ngjashme nga territori turk.
Qyteti Kobani ndodhet në kufi me Turqinë.
Turqia tashmë strehon mbi 160,000 refugjatë nga kjo zonë.