SHBA dhe Ukraina mohojnë pretendimet e Putinit

Shtetet e Bashkuara dhe Ukraina mohojnë se Kievi po përgatit ofensivë ushtarake në rajonin lindor.

Një pohim të tillë e bëri presidenti rus Vladimir Putin gjatë konferencës së tij, të enjten më 23 dhjetor.

Zëdhënësja e Shtëpisë së Bardhë, Jen Psaki, tha se “faktet e bëjnë të qartë se agresioni i vetëm në kufirin ndërmjet Rusisë dhe Ukrainës, është grumbullimi i ushtarëve rusë dhe retorika luftarake nga lideri i Rusisë”.

Vladimir Putin ka pohuar se shqetësimi i Perëndimit për grumbullimin e trupave ruse dhe një pushtim të mundshëm të Ukrainës, mund të jetë pretekst i një përpjekjeje të mundshme të Ukrainës për të nisur ofensivë kundër separatistëve në lindje.

SHIKONI EDHE: Putin i kërkon Perëndimit garanci të menjëhershme për sigurinë

Zyrtarët e Ukrainës kanë mohuar një mundësi të nisjes së një ofensivë kundër separatistëve.

Zëdhënësi i Ministrisë së Jashtme të Ukrainës, Oleg Nikolenko tha se pretendimi i Putinit është i pavërtetë.

SHIKONI EDHE: SHBA dhe Rusia pajtohen për të biseduar për çështje të sigurisë

Në javët e fundit, Shtetet e Bashkuara, NATO-ja dhe Kievi kanë ngritur alarmin për rreth 100,000 ushtarë rusë, të vendosur pranë kufirit me Ukrainën dhe në Krime.

Zyrtarë amerikanë kanë thënë se Moska është duke planifikuar një ofensivë të mundshme ushtarake, që nëse ndodh, mund të shpërthejë brenda javësh.