Ndërlidhjet

Hetimi ndaj Estemirovës, në rrugë të gabuar


Grupet ruse për të drejtat e njeriut thanë se dëshmitë e ADN-së tregojnë se dy personat e akuzuar për vrasjen e koleges së tyre, nuk e kanë kryer krimin.

Natalia Estemirova, e cila mblidhte të dhëna për abuzimet me të drejtat e njeriut që bënin forcat e sigurisë në Çeçeni, qe rrëmbyer më 15 korrik të vitit 2009 në Grozni.
Trupi i saj, i qëlluar disa herë, është gjetur në provincën fqinje.

Hetuesit rusë thanë se dy vëllezër, që i përkisnin një grupi militant islamik e kishin vrarë Estemirovën.

Njëri vëlla qe vrarë nga forcat e sigurisë. Tjetri, Anzor Bashajev, pat ikur në Francë, ku i ishte dhënë azil politik.

Grupi “Memorial” tha se nga ADN-ja e Anzor Bashajevit është parë se as mostra e tij e as e vëllait të tij, nuk përputhen me djersën e gjetur në rrobat e Estemirovës.

Lideri i “Memorial” Oleg Orlov përsëriti se lideri i Çeçenisë Ramzan Kadirov duhet të mbahet përgjegjës për vrasjen e Estemirovës.

Orlov tha se hetimet zyrtare kanë “marrë drejtimin e gabuar”.

Ndërkohë, disa organizata për të drejtat e njeriut, përfshirë Amnesty International dhe Human Rights Watch kanë lëshuar një deklaratë të përbashkët, ku thonë se autoritetet kanë dështuar, që të hetojnë në mënyrë të duhur vrasjen.
XS
SM
MD
LG