Dy nga linjat më të mëdha ajrore në Evropë kanë vendosur të shmangin fluturimet mbi Gadishullin Sinai të Egjiptit, derisa të qartësohet se çfarë ka shkaktuar rrëzimin e avionit rus të pasagjerëve, të shtunën në këtë zonë.
Lufthansa e Gjermanisë dhe Air France e Francës kanë vendosur të shmangin fluturimet në zonë për arsye të sigursië, kanë thënë përfaqësuesit e tyre.
“Kemi marrë vendim që të shmangim zonën sepse situata dhe arsyet e rrëzimit (të avionit rus) nuk janë të qarta”, ka thënë një zëdhënëse e Lufthansës.
Sipas saj, Lufthansa ka më pak se dhjetë fluturime në ditë që kalojnë nëpër zonën në fjalë.
“Air France konfirmon se shmang fluturimet mbi zonën e Sinait si masë paraprake”, ka thënë një zëdhënëse e kompanisë franceze.
Avioni rus i pasagjerëve është rrëzuar të shtunën me 224 njerëz në bord.
Është konfirmuar se të gjithë pasagjerët dhe pjesëtarët e ekuipazhit kanë humbur jetën.
Një grup militant, i lidhur me grupin ekstremist të Shtetit Islamik, ka thënë se ka rrëzuar aeroplanin.
Pretendimet e tilla janë hedhur poshtë nga autoritetet ruse, të cilat kanë thënë se nuk dihen ende shkaqet e aksidentit.