Kazakistani dhe Bashkimi Evropian e kanë nënshkruar sot marrëveshjen historike për lidhje më të ngushta.
Marrëveshjen e Bashkëpunimit dhe Partneritetit është nënshkruar në kryeqytetin kazak Astana, në mes të shefes së BE-së për politikë të jashtme dhe siguri, Federica Mogherini dhe ministrit të jashtëm kazak, Erlen Idrisov.
Marrëveshja është nënshkruar pas katër vjet bisedimesh.
BE-ja ka qenë e interesuar për ta forcuar bashkëpunimin me Kazakistanin, vend i cili e ka ekonominë më të madhe në Azinë Qendrore.
Teksa BE-ja dhe Astana e kanë nënshkruar marrëveshjen, presidenti rus, Vladimir Putin gjatë një takimi me homologun e tij kazak, e ka vlerësuar lartë bashkëpunimin në mes të Rusisë dhe Kazakistanit.
“Ne vazhdojmë të punojmë në konvergjencë me politikat tona, duke përfshirë sferën e doganës dhe rregullave teknike por edhe në fusha të tjera. E gjithë kjo, në mënyrë të pashmangshme e ka efektin pozitiv”, i tha sot në Moskë presidenti Putin, homologut të tij kazak, Nursultan Nazarbaev.
Kazakistani është aleat kyç i Moskës në Unionin Ekonomik Euroaziatik.
