Ndërlidhjet

Kërkohet monitorim i përforcuar për zgjedhjet


Ambasadorja e OSBE-së në Shkup, Nina Soumajllajnen, në një intervistë për Radion Evropa e Lirë, e ka cilësuar “procesin e pastrimit të listave zgjedhore si solide’ dhe ka thënë se janë ndërmarrë masa të duhura për garantimin e një procesi të besueshëm zgjedhor.

Soumajllajnen iu referua pastrimit të regjistrit zgjedhor si një nga pikat për të cilat zhvillohet polemika nga ana e forcave politike po dhe analistët, pas shlyerjes së 40 mijë votuesve.

“Në po të njëjtën mënyrë si njësitë zgjedhore ashtu edheregjistri zgjedhor duhet të jetë subjekt i kontrolleve të vazhdueshme. Mund të themi se janë ndërmarrë disa masa lidhur me 40 mijë votuesit të cilët u shlyen nga regjistri zgjedhor, një pjesë e të cilëve sërish u regjistruan kurse në pjesë tjetër akoma kanë mundësi për t’u regjistruar para se të mbahen zgjedhjet".

"Përderisa 170 mijë votuesit e tjerë që janë vendosur në listën plotësuese të cilët besohet se janë me punët përkohshme jashtë vendit, është arritur ujdi që për këtë kategori të sigurohet monitorim plotësues gjatë procesit zgjedhor. Pra, mendoj se është bërë përparim në drejtimin e duhur”, tha ambasadorja e OSBE-së në Shkup.

Soumallajnen tha se zgjedhjet në Maqedoni do monitorohen nga OSBE/ODIHR, me rreth 200 deri 300 vëzhgues afatshkurtër dhe 20 deri më 30 vëzhgues afatgjatë.

Por, Albert Musliu nga Instituti për Zhvillimin e Demokracisë thotë se procesi zgjedhor në Maqedoni duhet të ndiqet nga një monitorim i rreptë nga ana e faktorit ndërkombëtar, sepse kësaj radhe paritë nuk garojnë vetëm për të siguruar besimin e qytetarëve dhe marrjen e pushtetit, por humbja për një pjesë të politikanëve “do të thotë përballje me drejtësinë”, pasi ndaj tyre tanimë ka ngritur padi Prokuroria Speciale Publike.

“Gjithsesi se jam i mendimit se monitorimi këtyre zgjedhjeve duhet të jetë më i përforcuar, jo vetëm nga ana e faktorit ndërkombëtar, por edhe nga ana e vëzhguesve të brendshëm. Nuk duhet harruar se faktori ndërkombëtar është ai që i jep kredibilitet procesit zgjedhor po aq sa edhe vëzhguesit e brendshëm me prezencën e tyre në çdo pikë gjatë tërë periudhës së procesit zgjedhor. Besoj se partnerët ndërkombëtar tani e kanë më të qartë se në cilat pjesë duhet të koncentrohen më shumë".

"Për shkak të krizës së thellë politike besoj se faktori ndërkombëtarë do të jetë më i vëmendshëm në mënyrën se si kontrollojnë procesin veçanërisht në raportin vlerësues për procesin zgjedhor”, thotë Musliu.

Albert Hani nga organizata joqeveritare “Qendra për Menaxhimin e Konflikteve”, thotë se dhuna e ushtruar përmes presioneve të ndryshme psikike po edhe ajo fizike ka qenë e pranishme gjatë të gjitha proceseve zgjedhore, andaj organizata që përfaqëson është angazhuar për vetëdijësimin e qytetarëve që pa frikë dhunën ta denoncojnë në organet e sigurisë dhe drejtësisë, sepse një votë e humbur “do të thotë një shtyllë e rrënuar në sistemin e vlerave demokratike”.

“Dhuna ka qenë element përbërës pothuajse i të gjitha proceseve zgjedhore në të kaluarën, andaj si organizatë joqeveritare jemi fokusuar në vetëdijësimin e qytetarëve, mendoj votuesit se dhuna është diçka e panevojshme gjatë vendimmarrjes se kujtdo t`ia besojnë votën ose për cilin opsion politik do të votojnë".

"Ende ekziston frika për denoncimin e rasteve kur kemi të bëjmë me ushtrimin e dhunës fizike ose asaj psikike andaj ne fokusohemi në vetëdijësimin e elektoratit për ta denoncuar, sepse nuk kemi të bëjmë vetëm me një votë të manipuluar në këtë rast por edhe për vendosjen e vlerave të reja demokratike në sistem”, thotë Albert Hani.

Ndryshe gjatë ditës ambasadori i Bashkimit Evropian në Shkup, Samuel Zbogar, në kuadër të konferencës "Metoda të Avancuara për Monitorim të financimit të partive politike dhe fushatave zgjedhore” ka theksuar se fushata e drejtë dhe zgjedhjet kredibile në dhjetor, janë hapi kyç drejt zgjidhjes së krizës politike në Maqedoni. (REL)

Facebook Forum

XS
SM
MD
LG