Zyrtarët thonë se kryeministri turk, Binali Yildirim, është takuar me shefin e CIA-së, Mike Pompeo, ndërsa të dy janë pajtuar për bashkëpunim më të afërt në luftën kundër terrorizmit dhe krimit të organizuar.
Gjatë diskutimeve të sotme, Yildirim e ka përsëritur kërkesën për përkrahje amerikane për veprimet turke kundër lëvizjës që e udhëheq kleriku turk që jeton në SHBA, Fetullah Gylen.
Kjo përfshinë kërkesën për ekstradimin e tij nga SHBA në Turqi, thuhet në njoftimin e zyrës së kryeministrit të Turqisë.
Gylen kërkohet në Turqi me dyshimin se e ka organizuar puçin e dështuar të vitit të kaluar. Gyleni e ka hedhur poshtë akuzën.
Pompeo ka arritur në Turqi më 9 shkurt, duke e bërë këtë vizitën e tij të parë prejse është konfirmuar në këtë post.
Ai është takuar me presidentin turk, Rexhep Tajip Erdogan, dhe homologun e tij turk për të diskutuar luftën kundër grupit ekstremist, Shteti Islamik në Siri dhe Irak.
Zyrtarët kanë thënë se Pompeo ka mundësi se do të diskutojë planin e operacionit për rimarrjen e qytetit sirian Raka nga kontrolli i militantëve të Shtetit Islamik.
