Ndërlidhjet

Amerikanët këshillohen të vendosin maskat mbrojtëse


Një grua me maskë mbrojtëse në Nju Jork

Administrata e presidentit amerikan, Donald Trump, të enjten, dukej e vendosur t’iu bashkohej zyrtarëve lokalë, në këshillimin e amerikanëve të vishnin maska kur dilnin jashtë si masë mbrojtëse ndaj koronavirusit.

Numri i të vdekurve në SHBA u rrit me 1.000 gjatë një dite të vetme, shifër kjo që nuk ishte shënuar më herët.

Duke folur në një konferencë për media në Shtëpinë e Bardhë, Deborah Birx, një anëtare e Grupit Punues për luftimin e koronavirusit - i emëruar nga presidenti amerikan Donald Trump - tha se Qendrat për Kontrollin dhe Parandalimin e Sëmundjeve (CDC) do të shtonin në ditët e ardhshme një rekomandim për vendosjen e maskave në udhëzimet për masat mbrojtëse.

Por, Birx tha se të gjithë amerikanët, që u është kërkuar të qëndrojnë në shtëpi, nuk duhet të krijojnë një "ndenjë të rreme të sigurisë" se ata do të mbrohen plotësisht nga sëmundja duke vendosur maskat.

Presidenti Trump, tha se vetëm "nëse njerëzit duan t'i veshin ato, ata munden".

Që nga e enjtja në mbrëmje, numri i të vdekurve nga SHBA nga COVID-19 - sëmundja e frymëmarrjes e shkaktuar nga koronavirusi - ishte 5,887, me më shumë se 243,000 raste të të infektuarve në të 50 shtetet.

Rastet globale të të infektuarve tejkaluan shifrën 1 million, me më shumë se 52,000 vdekje.

XS
SM
MD
LG