Zyrtarët rumunë thanë se së paku pesë persona kanë vdekur pas shpërthimit të zjarrit në një spital në Bukuresht, ku po trajtoheshin pacientë me koronavirus.
Sekretari i Ministrisë së Brendshme, Raed Arafat, tha se tre pacientë janë gjetur të vdekur në spitalin Matei Bals, ndërsa i katërti ka vdekur pavarësisht përpjekjeve për ta shpëtuar.
Trupi i viktimës së pestë u gjet më vonë në një nga banjat, konfirmoi ministri i Brendshëm rumun, Lucian Bode.
Sipas tij, 60 njerëz u transferuan në ndërtesa të tjera të Institutit Matei Bals dhe 44 të tjerë në spitale të tjera të Bukureshtit.
Zjarri, i cili u shua, shpërtheu në katin e parë, rreth orës 5 të mëngjesit.
Sipas zjarrfikësve, në ndërtesë kanë qenë reth 200 njerëz në kohën e zjarrit.
Shkaku i incidentit nuk dihet ende.
Ministria e Shëndetësisë sugjeroi se ai mund të jetë shkaktuar nga një qark i shkurtër elektrik.
Autoritetet kanë nisur tashmë hetimet.
Rumania, njëri nga vendet më të varfra në Bashkimin Evropian, po përpiqet ta menaxhojë pandeminë e koronavirusit me një sistem të dobët shëndetësor dhe mungesa stafi.
Ky vend me 19 milionë banorë ka raportuar mbi 721,000 raste me koronavirus dhe mbi 18,100 viktima.
