Mijëra qytetarë u mblodhën më 18 shtator në Prishtinë, në një protestë të thirrur nga Organizata e Veteranëve të Luftës së Ushtrisë Çlirimtare të Kosovës (UÇK), për të kundërshtuar dënimin për krime lufte të katër ish-krerëve të UÇK-së nga Dhomat e Specializuara të Kosovës, në Hagë. Protestuesit kërkuan, ndër të tjera, ndryshimin ose shfuqizimin e ligjit për atë që njihet edhe si Gjykata Speciale, dhe më shumë mbështetje institucionale për mbrojtjen e të dënuarve.