Qytetarë mblidhen pranë Speciales në Hagë
Ndërsa afrohet nisja e seancës, qytetarë janë mbledhur pranë ndërtesës së Dhomave të Specializuara në Hagë.
Disa prej tyre mbajnë flamuj të UÇK-së, si dhe fotografi të Thaçit, Veselit, Selimit dhe Krasniqit.
Më poshtë mund të shihni pamje nga Haga pak para nisjes së seancës.
Edhe një orë deri në nisjen e seancës
Edhe një orë ka mbetur deri në nisjen e seancës në Dhomat e Specializuara në Hagë, ku do të shqiptohet aktgjykimi i shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit. Seanca pritet të nisë në orën 10:00, ndërsa transmetimi publik në ueb-faqen e Dhomave të Specializuara do të bëhet me 10 minuta vonesë.
Për çfarë akuzohen Thaçi dhe të tjerët?
Hashim Thaçi, Kadri Veseli, Rexhep Selimi dhe Jakup Krasniqi - të gjithë figura të larta të Ushtrisë Çlirimitare të Kosovës gjatë luftës së viteve 1998 dhe 1999 - ndodhen në paraburgim në Hagë që nga nëntori i vitit 2020, kur u bë publike aktakuza kundër tyre.
Ajo përfshin gjashtë pika për krime kundër njerëzimit: përndjekje, burgosje, akte të tjera çnjerëzore, torturë, vrasje dhe zhdukje me forcë, si dhe katër pika për krime lufte: arrestim dhe ndalim të paligjshëm ose arbitrar, trajtim mizor, torturë dhe vrasje.
Në atë dosje, katërshja përshkruhet si pjesë e një “ndërmarrjeje të përbashkët kriminale”, që synonte marrjen dhe ushtrimin e kontrollit përmes frikësimit, keqtrajtimit dhe largimit të kundërshtarëve.
Viktimat e tyre, sipas aktakuzës, përfshinin serbë, romë dhe shqiptarë që nuk mbështesnin UÇK-në.
Së paku 102 persona dyshohet se u vranë, ndërsa më shumë se 20 mbeten të zhdukur.
Prokuroria pretendon gjithashtu se të akuzuarit, për shkak të pozitave të tyre drejtuese, mbajnë përgjegjësi edhe për krimet e kryera nga vartësit e tyre.
Të katër të akuzuait janë deklaruar të pafajshëm për akuzat.
Çfarë presin qytetarët nga verdikti?
Pak para shpalljes së aktgjykimit ndaj katër ish-krerëve të UÇK-së, Radio Evropa e Lirë ka pyetur qytetarë në pjesë të ndryshme të Kosovës se çfarë presin nga vendimi i 16 shtatorit.
Nga Buroja në Podujevë, ata kanë ndarë pritjet dhe pikëpamjet e tyre për një prej vendimeve më të pritura të Dhomave të Specializuara.
Ellis: Aktgjykimi mund të ketë peshë përtej Kosovës
Mark Ellis, drejtor i Odës Ndërkombëtare të Avokatëve, thotë se aktgjykimi ndaj Thaçit, Veselit, Selimit dhe Krasniqit mund të ketë rëndësi edhe për zhvillimin e së drejtës penale ndërkombëtare.
Sipas tij, një nga çështjet kryesore është nëse Prokuroria ka arritur të dëshmojë ekzistencën e një ndërmarrjeje të përbashkët kriminale dhe pjesëmarrjen e secilit të akuzuar në të.
Gjykatësit duhet të vlerësojnë gjithashtu nëse të akuzuarit kishin kontroll efektiv mbi vartësit dhe nëse dinin, ose kishin arsye të dinin, për krimet e pretenduara.
Ellis thotë se, pavarësisht rezultatit, aktgjykimi mund t’i shtohet jurisprudencës ekzistuese dhe të ndikojë në mënyrën se si gjykatat ndërkombëtare trajtojnë këto forma të përgjegjësisë penale.
