Thaçi dhe Krasniqi dënohen me nga 25 vjet burgim për krime lufte, Veseli me 18, Selimi me 13

Qytetarë të mbledhur para ndërtesës së Qeverisë po vazhdojnë protestën e tyre, pas vendimit dënues të Speciales kundër katërshes së UÇK-së.

Disa nga protestuesit kërkuan që deputetët e Kuvendit të Kosovës të mblidhen dhe të diskutojnë se cila është rruga përpara, duke kërkuar që partitë të bëhen bashkë.

Në mesin e protestuesve ka edhe deputetë të PDK-së dhe Aleancës. Sala Jashari nga PDK tha se ka kërkuar që kryetarja e Kuvendit, Albulena Haxhiu, të thërrasë një seancë të jashtëzakonshme për të diskutuar për situatën e krijuar pas zhvillimeve në Hagë.

Më herët gjatë ditës, pati tensione para ndërtesës së Qeverisë, me disa persona që gjuajtën me gurë në drejtim të ndërtesës së ekzekutivit.

Presidenti i Serbisë, Aleksandar Vuçiq, duke komentuar vendimin e Gjykatës Speciale, tha se ai nuk përfshiu “krimet kundër njerëzimit” dhe “të gjitha krimet kundër serbëve pas 20 qershorit 1999”.

Ai po ashtu u ankua se në aktakuzën ndaj katërshes së UÇK-së nuk janë përfshirë edhe pretendimet për “trafikim organesh” dhe “shtëpia e verdhë”.

“Gjykata nuk e trajtoi qëllimin e UÇK-së për luftën për një Kosovë të pavarur, që në vetvete është një krim i paprecedent”, tha ai.

Gjykata hodhi poshtë gjashtë pika të aktakuzës që kishin të bënin me krime kundër njerëzimit. Hashim Thaçi, Kadri Veseli, Jakup Krasniqi dhe Rexhep Selimi u gjetën fajtorë për akuza për krime lufte. Mbrojtësit e tyre kanë paralajmëruar apelim të aktgjykimit.

Veprimtari shqiptaro-amerikan, Harry Bajraktari, e cilësoi si “skandaloz” vendimin e Gjykatës Speciale ndaj katërshes së UÇK-së, duke vlerësuar se sot është ditë “e trishtueshme për Kosovën, por edhe për drejtësinë ndërkombëtare”.

“Ata u dënuan sepse qëndruan me popullin e tyre kundër shtypjes, brutalitetit, pastrimit etnik dhe mizorive të regjimit serb. Në anën tjetër, bota po e lejon Serbinë që të ikë nga përgjegjësia për vrasjen e mbi 10.000 personave dhe masakrimin e tyre dhe për përdhunimin e mbi 20.000 grave. Kjo është një nga padrejtësitë më të mëdha në histori. Është absurde”, shkroi ai në X.

Bajraktari tha se tani udhëheqësit politikë duhet të reflektojnë dhe Kosova duhet të përgatitet që të përballet “me këtë padrejtësi”.

“Për ta fituar këtë betejë, të gjitha ndasitë mes udhëheqësve politikë duhet të ndalen sot”, tha ai.

Bajraktari ftoi Lëvizjen Vetëvendosje, PDK-në, LDK-në dhe Aleancën që të bashkohen për të “mbrojtur popullin e Kosovës”, duke argumentuar se askush nuk përfiton nga urrejtja, ndasitë, fajësimi apo “lojërat politike”.

“Tani, më shumë se kurrë Kosova ka nevojë për institucione stabile, unitet, pjekuri politike, zhvillim ekonomik, një ushtri të fortë dhe angazhim të fuqishëm me Uashingtonin, Brukselin, Londrën, Parisin, Berlinin dhe kudo që diskutohet e ardhmja e Kosovës”, tha ai.

Dhjetëra qytetarë protestuan para ndërtesës së Qeverisë së Kosovës, pas aktgjykimit fajësues ndaj katër ish-eprorëve të UÇK-së.

Protesta u përshkrua me tensione, teksa disa të pranishëm hodhën gurë në drejtim të ndërtesës së Qeverisë, duke thyer disa xhama.

Në qendër të Prishtinës ende ka grupe qytetarësh që po protestojnë. Aty ka të pranishëm edhe anëtarë të OVL-UÇK-së dhe deputetë të PDK-së që po bisedojnë me qytetarët e mbledhur.