Gucati: Nuk duhet t’i humbim shpresat, mbetet apeli
Kryetari i OVL-UÇK-së, Hysni Gucati, e ka dënuar ashpër aktgjykimin ndaj ish-krerëve të UÇK-së, duke e cilësuar Gjykatën Speciale si “gjykatë të tmerrshme dhe kriminale”.
“Sot gjykata arriti të kënaqë Serbinë dhe Rusinë me këto dënime”, tha Gucati.
Ai tha se shpresat tani mbeten te procesi i apelit.
Haxhiu: Dënimet janë goditje e rëndë, fjala e fundit juridike nuk është thënë
Ushtruesja e detyrës së presidentit të Kosovës, Albulena Haxhiu, i ka cilësuar dënimet ndaj Hashim Thaçit, Kadri Veselit, Jakup Krasniqit dhe Rexhep Selimit si “goditje të rëndë” për familjet e tyre dhe “lajm thellësisht tronditës” për Kosovën.
Në reagimin pas shpalljes së aktgjykimit, Haxhiu tha se procesi juridik nuk ka përfunduar dhe përmendi mundësinë e ankimit.
“Fjala e fundit juridike nuk është thënë. E drejta e ankimit është pjesë e procesit dhe duhet të ushtrohet plotësisht”, shkroi ajo në Facebook.
Haxhiu tha se lufta e UÇK-së “ishte çlirimtare” dhe se, sipas saj, aktgjykimi nuk duhet të përdoret për të relativizuar krimet e kryera nga regjimi serb gjatë luftës në Kosovë.
Ajo bëri thirrje për qetësi dhe unitet pas shpalljes së dënimeve.
“Sot na duhet qetësi, dinjitet dhe bashkim. Dhimbja e kësaj dite nuk duhet të na ndajë”, tha Haxhiu.
Tensione pranë Gjykatës Speciale në Hagë
Disa media raportojnë për tensione pranë ndërtesës së Dhomave të Specializuara në Hagë pas shpalljes së aktgjykimit ndaj ish-krerëve të UÇK-së.
Sipas raportimeve dhe pamjeve të publikuara në rrjetet sociale, disa persona u ngjitën mbi automjetet e policisë dhe i goditën ato, ndërsa policia përdori ujë për shpërndarjen e turmës.
Situata raportohet se më pas është qetësuar.
