Daçiq: Aktgjykimi "konfirmon" pretendimet e Serbisë për UÇK-në
Zëvendëskryeministri dhe ministri në detyrë i Punëve të Brendshme të Serbisë, Ivica Daçiq, tha se aktgjykimi ndaj Hashim Thaçit, Jakup Krasniqit, Kadri Veselit dhe Rexhep Selimit përbën, sipas tij, konfirmim të pretendimeve të Serbisë për UÇK-në.
Daçiq pretendoi se vendimi dëshmon se UÇK-ja ishte “organizatë kriminale dhe terroriste” dhe se udhëheqësit e saj të lartë politikë dhe ushtarakë ishin përgjegjës për krime gjatë luftës në Kosovë.
Dhomat e Specializuara, megjithatë, i gjykuan katër të akuzuarit mbi bazën e përgjegjësisë së tyre penale individuale.
Ata u shpallën fajtorë për krime lufte, ndërsa u liruan nga akuzat për krime kundër njerëzimit.
Daçiq kritikoi pikërisht rrëzimin e akuzave për krime kundër njerëzimit, duke e cilësuar atë si “manovër politike” dhe duke pretenduar se vendimi minimizon vuajtjet e viktimave serbe.
Ai tha se as dënimet e shqiptuara nuk janë të mjaftueshme për familjet e viktimave.
Ahmeti e quan “të padrejtë” aktgjykimin ndaj ish-krerëve të UÇK-së
Udhëheqësi i Bashkimit Demokratik për Integrim (BDI) në Maqedoninë e Veriut dhe një nga bashkëthemeluesit e UÇK-së, Ali Ahmeti, e ka cilësuar si “të padrejtë dhe thellësisht zhgënjyes” aktgjykimin ndaj Hashim Thaçit, Jakup Krasniqit, Kadri Veselit dhe Rexhep Selimit.
Ahmeti bëri thirrje për maturi dhe unitet, duke kërkuar që të shmangen tensionet dhe përçarjet pas shpalljes së dënimeve.
Ai theksoi se të katërtit u liruan nga akuzat për krime kundër njerëzimit dhe se pretendimet e mëhershme për trafikim organesh nuk u përfshinë në akuzat e këtij procesi.
“Këto janë fakte që duhet të kujtohen sa herë që dikush përpiqet ta paraqesë UÇK-në si ndërmarrje kriminale”, tha Ahmeti.
Ai shprehu bindjen se gjetjet për të cilat katër ish-krerët e UÇK-së u shpallën fajtorë, do të kundërshtohen në procesin e apelit.
“Procesi nuk përfundon këtu. Besojmë se mbrojtja do ta vazhdojë betejën juridike në Gjykatën e Apelit, duke kundërshtuar gjetjet e shkallës së parë dhe duke kërkuar drejtësi deri në fund”, shkroi Ahmeti në rrjetet sociale.
Dhjetëra qytetarë mblidhen pranë EULEX-it pas aktgjykimit në Hagë
Dhjetëra qytetarë janë mbledhur pranë ndërtesës së Misionit të BE-së për Sundim të Ligjit, EULEX, në zonën industriale në Prishtinë, pas shpalljes së aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit.
Disa prej tyre kanë hedhur gurë në drejtim të ndërtesës.
Tubimi vjen pasi Dhomat e Specializuara në Hagë i dënuan katër ish-krerët e UÇK-së për krime lufte, me dënime që shkojnë nga 13 deri në 25 vjet burgim.
Nuk është bërë menjëherë e qartë pse protestuesit kanë zgjedhur ndërtesën e EULEX-it si vend të tubimit.
Megjithatë, ky mision ka rol mbështetës ndaj Dhomave të Specializuara dhe Zyrës së Prokurorit të Specializuar, të cilave u ofron mbështetje logjistike dhe operacionale, ndërsa BE-ja është financuesja kryesore e tyre.
Udhëheqësit politikë në Kosovë kanë bërë thirrje për qetësi dhe përmbajtje.
