Përshëndetje të gjithëve,
Mirë se vini në mbulimin e drejtpërdrejtë të ceremonisë së inaugurimit të presidentit të 47-të të Shteteve të Bashkuara të Amerikës, Donald Trump.
Me ju në orët në vazhdim do të jem unë Valona Tela.
Na ndiqni!
Kush është Donald Trump?
Republikani Donald Trump, 78 vjeç, kthehet në Shtëpinë e Bardhë pasi fitoi zgjedhjet presidenciale të vitit 2024 kundër demokrates Kamala Harris.
Manjati i pasurive të patundshme shërbeu si president edhe gjatë viteve 2017-2021.
Ai i humbi zgjedhjet e vitit 2020 kundër kandidatit të atëhershëm demokrat, Joe Biden, por refuzoi ta pranonte rezultatin.
Pas një fjalimi në Uashington, më 6 janar, 2021, mbështetësit e tij sulmuan ndërtesën e Kongresit amerikan.
Pesë njerëz humbën jetën në trazira.
Trump lindi në Kuins të Nju Jorkut në vitin 1946 nga nëna Mary Anne MacLeod, skoceze, dhe babai Fred Trump, djalë i imigrantëve gjermanë.
Babai i tij ishte manjat i pasurive të patundshme në Nju Jork dhe Trump iu bashkua biznesit familjar dhe u bë udhëheqës i tij në vitin 1971.
Trump ka tre fëmijë - Donald Jr, Ivanka dhe Eric - me gruan e parë, Ivana; vajzën Tiffany me gruan e dytë, Marla Maples, dhe djalin Barron me gruan aktuale, Melania Trump.
Këtë muaj, Trump u dënua për blerje të heshtjes nga një aktore e pornografisë, përpara zgjedhjeve të vitit 2016, por atij nuk iu shqiptua asnjë dënim.
Ai përballet edhe me tri gjyqe të tjera penale - përfshirë dy për përpjekje për të përmbysur rezultatin e zgjedhjeve të vitit 2020.
Trump u mbijetoi dy tentativave për vrasje në vitin 2024.
Një person i armatosur qëlloi drejt tij gjatë një tubimi në Pensilvani në muajin korrik. Trump u plagos në vesh, ndërsa një spektator u vra.
Dy muaj më vonë, një tjetër tentativë e dukshme për vrasjen e tij, në fushën e tij të golfit në Floridë, u pengua nga agjentët e Shërbimit Sekret.
“Zoti ma ka shpëtuar jetën… jo një herë, por dy herë”, tha Trump në një tubim në Nju Jork.
Çka është inaugurimi?
Inaugurimi është ceremonia zyrtare që shënon fundin e mandatit të një presidenti dhe fillimin e mandatit të presidentit pasardhës.
Është pjesa më kulminante e tranzicionit të pushtetit mes dy udhëheqësve.
Ajo përfshin betimin e presidentit të zgjedhur - në këtë rast të Donald Trumpit - që thotë:
“Betohem solemnisht se do të shërbej me besnikëri në Zyrën e Presidentit të Shteteve të Bashkuara dhe do ta bëj më të mirën për të ruajtur dhe mbrojtur Kushtetutën e Shteteve të Bashkuara”.
Edhe pse Trump i fitoi zgjedhjet në nëntor, ai bëhet zyrtarisht presidenti i 47-të i SHBA-së, pasi t’i thotë këto fjalë.
JD Vance do të betohet gjithashtu, përpara se ta marrë zyrtarisht postin e zëvendëspresidentit.
Për të parë se si kanë rrjedhur përgatitjet për ceremoninë e inaugurimit, klikoni fotografitë më poshtë:
Përgatitjet për inaugurimin e presidentit Trump
Ku zhvillohet ceremonia e inaugurimit?
Procedurat e inaugurimit të presidentit zhvillohen tradicionalisht jashtë ndërtesës së Kongresit amerikan, në Uashington.
Megjithatë, këtë vit, ceremonia u zhvendos në ambient të brendshëm, për shkak të motit të ftohtë.
Përmes një postimi në mediat sociale, Trump tha të premten se e ka kërkuar një gjë të tillë, sepse “nuk do që të shohë njerëz të lënduar në asnjë mënyrë”.
Fjalimi i inaugurimit dhe procedurat e tjera do të zhvendosen brenda Kongresit, ashtu si edhe zona e shikimit për mysafirë, ligjvënës dhe personalitete të tjera.
Parada tradicionale u anulua gjithashtu.
Kjo nuk është hera e parë që moti ekstrem e zhvendos ceremoninë.
Në vitin 1985, inaugurimi i presidentit Ronald Reagan u bë në ambiente të mbyllura dhe parada tradicionale u anulua, për shkak të motit jashtëzakonisht të ftohtë.