Me objektiv karshi tankeve
🗣️Puna si gazetar në Ukrainë në këtë kohë është e rrezikshme dhe e lodhshme, por e domosdoshme për ta nxjerrë të vërtetën nga zona e krizës
Kosova dënon sulmin mbi Konsullatën e Shqipërisë në Ukrainë
Ministria e Punëve të Jashtme dhe Diasporës në Kosovë (MPJD) ka dënuar të hënën, 7 mars, sulmin e forcave ruse në Konsullatën e Nderit të Shqipërisë, në qytetin Harkiv në Ukrainë.
Në një komunikatë për media, Ministria ka thënë se objekti ku ndodhej konsullata shqiptare është shkatërruar në tërësi.
“MPJD i cilëson të papranueshme sulmet e vazhdueshme të Rusisë në Ukrainë, të cilat në ditët e fundit kanë cak institucionet diplomatike, pasi ditë më parë njëjtë është sulmuar edhe Konsullata e Sllovenisë”, është thënë mes tjerash në komunikatë.
Edhe Ministria për Evropë dhe Punë të Jashtme e Shqipërisë ka dënuar më herët gjatë së hënës sulmin në këtë objekt.
“Kryesit duhet të mbahen përgjegjës”, është thënë në postimin e Ambasadës në Twitter.
BE do të analizojë mundësitë e pranimit të Ukrainës, Gjeorgjisë dhe Moldavisë
Aplikacionet e Ukrainës, Gjeorgjisë dhe Moldavisë, për anëtarësim në Bashkimin Evropian, do të analizohen nga Komisioni Evropian.
Vendimi për të shqyrtuar aplikacionet, i marrë nga ambasadorët e bllokut evropian, duhet të nënshkruhet nga Këshilli Evropian, ndonëse ai konsiderohet formalitet procedural.
Përfaqësuesit e përhershëm të vendeve anëtare kanë diskutuar për aplikacionet – të dorëzuara javën e kaluar – në një takim të mbajtur më 7 mars, dhe janë pajtuar për të ftuar Komisionin për të dhënë mendimin e vet për secilin.
Megjithatë, procesi mund të marrë kohë – komentet e Komisionit mund të marrin 18 muaj kohë për t’u përgatitur.
Nëse janë të suksesshme, procesi për t’iu bashkuar BE-së zakonisht zgjat me vite.
Përfundon rundi i tretë i negociatave Ukrainë-Rusi
Këshilltari i Presidencës ukrainase, Mykhailo Podoliak, ka bërë të ditur për përfundimin e rundit të tretë të negociatave Ukrainë - Rusi në Bjellorusi, duke thënë se nuk është arritur përparim që përmirëson shumë situatën.
“Ka përparim në përmirësim të logjistikës së korridoreve humanitare… konsultimet intensive kanë vazhduar për armëpushim dhe garanci për sigurinë”, ka thënë ai në Twitter.
Përmes një videoje ai ka bërë të ditur se negociatat do të vazhdojnë për të diskutuar armëpushimin.
Edhe Ambasada ruse në Minsk, ka njoftuar për përfundim të bisedimeve, përmes një postimi në Telegram.
Ato është thënë të kenë zgjatuar rreth tri orë.