Art në mbështetje të Ukrainës
Nëpërmjet muraleve dhe veprave të tjera të artit, shumë vende të botës po solidarizohen me Ukrainën, pas pushtimit të saj nga Rusia.
Art në mbështetje të Ukrainës
Kremlini e quan “huliganizëm” protestën në televizionin rus
Kremlini e cilësoi si “huliganizëm” veprimin e një protestueseje ruse, e cila ndërpreu transmetimin e drejtpërdrejtë të lajmeve në televizionin shtetëror rus.
Marina Ovsyannikova, punonjëse në Kanalin Një, doli papritur pas prezantueses së lajmeve të hënën mbrëma, teksa ajo fliste për planet e Qeverisë ruse për të zbutur efektet e sanksioneve perëndimore.
Ovsyannikova mbante një tabelë në duar, ku shkruante: “Jo luftës, ndalojeni luftën, mos i besoni propagandës! Ata po gënjejnë këtu”.
Ajo është parë dhe dëgjuar për disa sekonda, përpara se televizioni të kalonte në një raport tjetër.
Zëdhënësi i Kremlinit, Dmitry Peskov, e cilësoi veprimin e saj si “huliganizëm”.
“Kanali televiziv dhe ata që janë përgjegjës, po e shqyrtojnë këtë [veprim]. Kjo nuk është në agjendën tonë”, tha Peskov, transmeton agjencia ruse e lajmeve, Interfax.
Rusia ka nisur pushtimin e paprovokuar të Ukrainës, më 24 shkurt.
Autoritetet ruse kanë arrestuar mijëra protestues në qytete të ndryshme të Rusisë, që kanë protestuar kundër luftës.
Në një video të regjistruar para protestës së saj dhe të postuar në internet, Ovsyannikova e identifikoi veten si punonjëse të Kanalit Një dhe foli kundër luftës.
“Ajo që po ndodh tani, është një krim. Rusia është një vend agresor dhe [presidenti rus] Vladimir Putin është i vetmi përgjegjës për këtë agresion”, tha Ovsyannikova.
Ajo tha se “bota është larguar nga ne” dhe se “dhjetë brezat e ardhshëm të pasardhësve tanë nuk do ta lajnë turpin e kësaj lufte vëllavrasëse”.
Ajo po ashtu u bëri thirrje rusëve që të dalin dhe të protestojnë.
Presidenti ukrainas, Volodymyr Zelensky, e falënderoi Ovsyannikovan për protestën e saj.
Ajo besohet se është në paraburgim, por nuk ka informacione të qarta.
Kievi shpall shtetrrethim 36-orësh
Kievi do të vendosë një shtetrrethim 36-orësh, nga e marta mbrëma, tha kryetari i tij, Vitali Klitschko.
Njoftimi vjen pasi ushtria ruse shtoi sulmet në kryeqytetin e Ukrainës, në përpjekje për të marrë kontrollin e tij.
“Sot është një moment i vështirë dhe i rrezikshëm”, tha Klitschko.
“Kjo është arsyeja përse u kërkoj të gjithë banorëve të Kievit që të përgatiten për të qëndruar në shtëpi për dy ditë, ose të futen në strehimore nëse sirenat bien”, shtoi ai.
Sipas tij, shtetrrethimi është “vendim i komandës ushtarake”.
Rusia thotë se ka marrë kontrollin e Hersonit
Një zëdhënës i Ministrisë së Mbrojtjes në Rusi tha se forcat ruse kanë marrë kontrollin e plotë të rajonit jugor të Ukrainës, Herson.
REL nuk ka mundur t’i verifikojë në mënyrë të pavarur pretendimet e Igor Konashenkovit.
Agjencia e lajmeve Interfax-AVN e citoi atë të ketë thënë se “forcat ruse kanë marrë kontrollin e plotë të të gjithë territorit”.
Zyrtarët e Ukrainës nuk i kanë komentuar ende këto pohime.
Hersoni është një qytet në jug të Ukrainës, i banuar me afro 290,000 banorë.