Sulmohen civilët gjatë evakuimit
Një pikë kalimi për evakuimin e civilëve që përpiqeshin të largoheshin nga qyteti Irpin në perëndim të Kievit, u bombardua të dielën në mëngjes, raporton CNN.
Mediat ndërkombëtare po filmonin në atë lokacion, kur ra një predhë, në kohën kur një grup civilësh po kalonte përmes postbllokut.
Sipas raportimeve, të paktën tre civilë janë vrarë, duke përfshirë dy fëmijë, mirëpo ende nuk janë konfirmuar viktimat.
Rifillon evakuimi në Mariupol
Autoritetet në Mariupol thonë se armëpushimi i ri ka hyrë në fuqi, që lejon evakuimin e civilëve të bllokuar.
Përpjekjet për evakuim filluan rreth një orë më parë.
Erdogan i kërkon Putinit të shpallë armëpushimin në Ukrainë
Presidenti turk, Recep Tayyip Erdogan, i ka kërkuar homologut të tij rus, Vladimir Putin, që të shpallë armëpushim në Ukrainë, të hapë korridoret humanitare dhe të nënshkruajë një marrëveshje paqeje, ka njoftuar zyra e presidentit turk.
Pas një telefonate njëorëshe, presidenca turke përmes një deklarate njoftoi se Erdogan i tha Putinit se Turqia është e gatshme të kontribuojë në një zgjidhje paqësore të konfliktit.
Sipas deklaratës, Erdogan tha se një armëpushim do të lehtësonte situatën humanitare.
“Presidenti Erdogan filloi bisedën me fjalinë: “le të hapim rrugën për paqen së bashku, thuhet në deklaratën për media.
Për më shumë lexoni këtu.
Putin: Sulmi do të përfundojë kur të plotësohen kërkesat e Moskës
Presidenti i Rusisë, Vladimir Putin i ka thënë presidentit turk, Recep Tayyip Erdogan, përmes telefonit, se Rusia do të ndalojë operacionin e saj ushtarak vetëm nëse Ukraina ndalon luftimet dhe kërkesat e Moskës përmbushen, thotë Kremlini.
Rusia këmbëngul se pushtimi i saj i Ukrainës nga toka, ajri dhe deti është një operacion ushtarak special, për të cilin Putin pretendon se, pa asnjë provë, është i nevojshëm për të “denazifikuar” vendin.
Udhëheqësi rus përsëriti se sulmi po shkon sipas planit.
Sipas deklaratës së Kremlinit, Putin shpreson që negociatorët ukrainas të kenë një qasje më konstruktive.
Zyra e presidentit Erdogan, tha se udhëheqësi turk kishte apeluar për një armëpushim urgjent të përgjithshëm.