Biden: Nuk dërgojmë trupa amerikane në Ukrainë
Presidenti amerikan Joe Biden tha të premten, më 11 mars, se SHBA-ja nuk do të dërgojë trupa në Ukrainë.
“Dua të jem i qartë: ne do të mbrojmë çdo pëllëmbë të territorit të NATO-s me fuqinë e plotë të një NATO-je të bashkuar dhe të fuqishme”, shkroi presidenti Biden në Twitter.
"Por ne nuk do të bëjmë një luftë kundër Rusisë në Ukrainë. Një konfrontim i drejtpërdrejtë midis NATO-s dhe Rusisë është Lufta e Tretë Botërore", shkroi presidenti amerikan.
Të premten Biden zhvilloi një konferencë për media ku foli për sanksionet e reja ndaj Rusisë. KËTU është lajmi i plotë:
Ukraina thotë se Rusia po shënjestron civilët
Zëvendëskryeministrja e Ukrainës ka akuzuar forcat ruse për shkelje të armëpushimit dhe për shënjestrimin e njerëzve që po evakuohen nga qytetet që janë duke u bombarduar.
Në një adresim përmes videos të postuar të premten, Iryna Vereshchuk, tha se bombardimet kishin penguar evakuimet nga qyteti Mariupol, ku një maternitet u bombardua këtë javë si dhe nga kryeqyteti ukrainas, Kiev.
Lexues të nderuar këtu e ndërpresim mbulimin direkt të luftës në Ukrainë, për t'u rikthyer sërish nga ora 7:00. Zhvillimet kryesore të ditës së premte kanë qenë:
- Zona me civilë ishin cak i granatimeve ruse në qytetin qendror të Ukrainës, Dnipro në orët e para të së premtes dhe gjatë ditës sulmet ruse u shtrinë edhe në qytete të tjera të Ukrainës.
- Shtetet e Bashkuara të Amerikës dhe Bashkimi Evropian vendosën sanksione të reja për Rusinë në kundërshtim të pushtimit të saj të Ukrainës. Këto sanksione synojnë të godasin ekonominë ruse drejtpërsëdrejti.
- BE-ja ndau 500 milionë euro të tjera për ndihmë ushtarake Ukrainës mirëpo nuk i premtoi një anëtarësim të shpejt në BE.
- Presidenti amerikan, Joe Biden tha se Rusia do të “paguaj një çmim të rëndë” nëse përdorë armë kimike në Ukrainë.
- Ambasadorja e SHBA-së në Kombet e Bashkuara, Linda Thomas-Greenfield, i tha Këshillit të Sigurimit të OKB-së se Rusia ka një histori të dokumentuar mirë të përdorimit të armëve kimike dhe nuk përjashtoi planet ruse për përdorim të armëve kimike dhe biologjike në Ukrainë.
- Agjencia e Kombeve të Bashkuara e migracionit tha se më shumë se 2.5 milionë njerëz janë larguar nga Ukraina deri më 11 mars, që nga nisja e luftës.
- Britania e Madhe vendosi të premten një valë të re sanksionesh ndaj Moskës, duke shënjestruar 386 anëtarë të parlamentit.
- Kremlini tha se konflikti në Ukrainë do të përfundojë kur Perëndimi ta marrë seriozisht Rusinë.
- Presidenti rus, Vladimir Putin, tha të premten se ka disa "ndryshime pozitive" në bisedimet ndërmjet Rusisë dhe Ukrainës.
- Zyra e Kombeve të Bashkuara për të drejtat e njeriut (OHCHR) tha të premten se ka konfirmuar vdekjen e 564 civilëve në Ukrainë që nga 24 shkurti, duke përfshirë 41 fëmijë.
Mirëmëngjesi të gjithëve!
Po e rinisim raportimin në kohë reale për luftën në Ukrainë.
Tani në Kiev është ora 08:00.
Në orët e para të mëngjesit të 12 marsit, Qeveria e Ukrainës ka akuzuar Rusinë se është duke parandaluar evakuimet.
Sipas saj, sulmet ruse kanë penguar sërish njerëzit që të largohen nga Mariupoli.
Autoritetet kanë thënë që më shumë se 1,500 njerëz janë vrarë në Mariupol dhe ata që kanë mbetur janë duke jetuar në temperatura shumë të ulëta.
Ky qytet aktualisht ka pak ujë dhe pak furnizime të ushqimit dhe ujit.
Në adresimin e tij të fundit, presidenti ukrainas, Volodymyr Zelensky, ka kritikuar Rusinë për bllokimin e njerëzve në qytet dhe refuzimin e saj për të dërguar ndihmë urgjente humanitare.
Zelensky ka thënë se më pak evakuime janë kryer nga katër qytetet kyçe ditëve të fundit, për shkak të sulmeve të vazhdueshme ruse.