Rusia thotë se kapacitetet ushtarake të Ukrainës “kanë degraduar seriozisht”
Ministria e Mbrojtjes së Rusisë tha të martën se kapacitetet ushtarake të Ukrainës kanë degraduar seriozisht.
Sipas Rusisë, faza e parë e “operacionit ushtarak” në Ukrainë ka përfunduar.
Moska i referohet pushtimit rus të Ukrainës si “operacion i posaçëm ushtarak”
Ministri i Mbrojtjes, Sergei Shoigu, gjatë një takimi me zyrtarët, paralajmëroi se Rusia do të përgjigjej nëse aleanca ushtarake e NATO-s do ta furnizonte Ukrainën me avionë dhe sisteme të mbrojtjes ajrore.
Bujqit ukrainas vazhdojnë lëvrimin pavarësisht luftës
Pranvera ka mbërritur në jugperëndim të Ukrainës – është koha që Alexander Petkov të fillojë t’i lëvrojë arat e tij. Por, lufta me Rusinë e ka penguar veprimtarinë e mbjelljes – si dhe furnizimet me ushqim për botën.
Britania ndalon një super-jaht rus
Britania ka ndaluar një super-jaht në pronësi të një rusi, tha zëdhënësi i kryeministrit, Boris Johnson.
“Departamenti i Transportit ka punuar ngushtë me Agjencinë Kombëtare të Krimeve dhe Byronë për Hetime Detare për të ndaluar super-jahtin”, tha zëdhënësi.
“Ne do të punojnë për të ndërmarrë veprime ndaj kujtdo që përfiton nga lidhjet ruse”, shtoi ai.
Lajmin e plotë mund ta lexoni KËTU
Zelensky: Rrethimi i Mariupolit, krim kundër njerëzimit
Presidenti ukrainas, Volodymyr Zelensky, tha se rrethimi rus i qytetit-port të Mariupolit përbën “krime kundër njerëzimit”.
Duke iu drejtuar Parlamentit danez, ai tha se krimet po ndodhin “para syve të të gjithë planetit që po i shikojnë në kohë reale”.
Disa ekspertë ushtarakë kanë sugjeruar se rënia e Mariupolit nën kontrollin rus mund të jetë e pashmangshme, por kanë shtuar se është e pamundur të thuhet se kur ose nëse diçka e tillë do të ndodhë.
Mariupoli, që gjendet në jug të Ukrainës, ka përjetuar sulmet më të ashpra ruse, teksa dhjetëra-mijëra civilë ende mbeten të bllokuar në këtë qytet që ka mbetur pa rrymë, ujë apo gaz.
Për shkak se qyteti është i rrethuar dhe po bombardohet vazhdimisht, civilët po kanë vështirësi që të evakuohen.
Agnes Callamard, sekretare e përgjithshme e organizatës Amnesty International e ka akuzuar Rusinë se ka kryer krime lufte në këtë qytet.
“Rrethimi i Mariupolit, ndalimi i evakuimit humanitar të banorëve dhe shënjestrimi i civilëve, sipas hetimit të Amnesty International përbëjnë krime lufte”, tha ajo gjatë një konference për media.
“Ky është realiteti i Ukrainës për momentin”, shtoi ajo.
Rusia mohon se shënjestron civilët, pavarësisht dëshmive se sulmon ndërtesa banimi dhe objekte të tjera joushtarake në mbarë vendin, përfshirë edhe në Mariupol.
